Vera hêrişê îşxalî yê dewleta tirke û hemkarîya PDKyî şarê kurdî payan ser o. Kurdîstanijî hema hema her roje Ewropa de vejîyenê kuçeyan hêrişê îşxalî, îxanetê PDKyî û bêvengîya Ewropa şermezar kenê. Ewro bajarê Strasbourgî yê Fransa de serkêşîya TJK-E de bi şîarê ''vera îşxal û îxanetî Kurdîstanî bipawê'' çalakîye ameye kerdene.

Rayraşîyayîşo ke Almanya û Swîsre ra endamê TJK-E tewrê ci bîyî Place de Republique dîyaye destpêkerdene heta verê Konseya Ewropa dewam kerd. Çalakwanê ke bi flamayanê PKK û Rayberê Şarê Kurdî Abdullah Ocalanî rayra şîyî bi sloganan xoverdayîşê gerîlayan selam kerd û îxanet şermezar kerd.

Badê rayraşîyayîşî verê Konseya Ewropa de eşkerayîya çapemenîye ameye dayene. Zozane Serhada ke tîya qisey kerd ard ziwan ke hêrişê îşxalî yo ke bi paşdayîşê PDKyî yeno kerdene armancê ci qirkerdişê kurdan o. Serhade vat: ''No semedê kurdan şerê estbîyayîş-çînbîyayîşî yo. Gerîlayê bi têkoşînê xo yê tarîxî anorê kurdan û merdimîye pawenê.  PKK , gerîlayî hêzê xopawitişî yê kurdan ê. Ewropa pê qedexekerdişê PKKyî paştî dano hêrişanê dewleta tirke. Dewleta tirke vera gerîlayan û sîvîlan çeka kîmyewîye şuxulnena la Ewropa bêveng a. Cinî, ciwan şarê kurdî vanê PKK şar o û wayîrê ci vejîyenê.  Têkoşînê kurdan û dostanê ci do tewr peynî de ser bikewo.''