Wekîlê Partîya Çepe û Vervatoxê Polîtîkayanê Teberî Hakan Svennelingî xebata krîmînalîzekerdişî ya Sapoyî ya vera kurdan berde Parlamentoya Swêdî. Hakan Svennelingî vizêr zî warêkê dîjîtalî de meseleya Afîf Gultekînî arde rojdem ke Sapo xîret keno Gultekîn welatî ra teber bikero.

Serekê Merkezanê Komelê Demokratîkî yê Kurdan ê Swêd û Îskandînavya Ridvan Altun zî tewrê kombîyayîşî bi. Kombîyayîş de xebatê Sapoyî yê vera kurdan ameyî ercnayene.

Afîf Gultekîno ke 6 serrî yo Swêd de yo, îfade kerd ke Sapo terefgîranê HDPyî û rêxistin û partîyanê kurdan krîmînalîze keno. 

Rojnameyê ETCyî yê Swêdî zî tewrê Sapoyî ser o cigêrayîşêko hîra weşana. Meqale de ame parekerdene ke Sapo kurdan krîmînalîze keno û welatî ra teber keno coka qesawetê kurdan Swêd de zêdîyeno.

Meqale de bale ameye antene serebûtê Zozane Buyuk ser. Zozane Buyuka ke dadîya 2 domanan a, 6 serrî verî Belçîka ra şîye Swêd de ca bîye. Sapoyî bire dabi ke Zozane 'seba asayîşê Swêdî gef a û wa welatî ra bêra teberkerdene.' Zozane bire red kerde la dima ke teda zêdîyaye domanêkê xo Swêd de verda û agêra Belçîka.

Mêrdeyê Zozane Buyuk Veysî Arîyî ETCyî rê qisey kerd û eşkera kerd ke Sapoyî dormeyê keyeyê înan girewt, ber şikit.

Ridvan Altunî da zanayene ke 30 kurdan tedayanê Sapoyî ra semed muracatê komeleyanê înan kerd û ard ziwan ke na hûmare zêdîyena. 

Afîf Gultekînî pare kerd ke Sapoyî îfade de tira persê sey 'Goreyê to PKK rêxistina terorî ya, mabenê PKK û HDPyî de têkilîyêka senîne esta' pers kerdî. Gultekînî vat: ''Persê înan mendêne persanê MÎTî coka ez mat menda. Heta 11ê gulane ganî ez Swêd biterikna. Na bira hukmatê Swêdî psîkolojîya mi xeripnaye.''

ETCyî meqaleya xo de eşkera kerd ke xeylêk kurdî maruzê tedayanê Sapoyî manenê la tersî ver gerre nêkenê. Goreyê meqale camêrdêkê kurdî seba destûrê roniştişî muracatê Sapoyî kerd. Sapoyî camêrdî rê 75 deqayan derheqê PKK û YPGyî de persî pêşkêş kerdî.

Camêrdî vat: ''Polîsan mi ra pers kerd ke cinîya mi Hêlîne seba PKKyî pere arê dana yan nê. Cinîya mi Hêlîne 30 serrî yo Swêd de ciwîyena, hemwelatîya Swêdî ya. A hem mamosta ya hem zî seba partîyêka parlament bi hawayêkê aktîfî xebitîyena. Heta polîsî ge ge seba açarnayoxîye venga ci danê. Persanê polîsan ez zaf şeqiznaya.''

Partîya Çepe û Partîya Karkeran a Demokrate partîya wayûbira ya HDPyî yê. Wird partî zî vera tedayanê serê HDPyî tewir gênê. Parlamenterê Partîya Çepe Håkan Svenneling û Endamê Komîsyonê Têkilîyanê Teberî yê Polîtîkayanê Teberî Anders Osterbergî zaf reyî tedayê vera HDPyî berdî rojdemê parlamento.

Osterbergî ard ziwan ke têkilîyê Sapoyî yê bi MÎTî kurdan rê mesele vejenê. Çend rojî verî zî Vervatoxê Polîtîkayanê Teberî yê Partîya Lîberale Fredrik Malmî vera xebatanê krîmînalîzekerdişî yê Sapoyî nêrazîbîyayîşê xo mojnabi.