Peymana Bexdad û Hewlêrî ya seba Şingalî şaristanê Sydneyî yê Avusturalya de rayberîya Merkezê Komelê Demokratîkî yê Kurdan (NCDK) de ameye şermezarkerdene.

Çalakîye de eşkerayîye ameye wendene û ame îfadekerdene ke êzidîyî bi rayîrê na peymane reyna yenê qirkerdene. Eşkerayîye de ame vatene ke kurdîstanijî do vera na peymane vejîyê.

Komîteya amadekarîye vist vîrî ke na peymane 9ê teşrîna verêne de roja Komployê Mîyanneteweyî de ameye îmzakerdene.

Çalakîye de venga hukmatê Avusturalya, Neteweyanê Yewbîyayeyan, DYA û Ewropa ame dayene ke vera qirkerdişan xoserîya Şingalî wa bêra şinasnayene.