Wekîlê verênî yê HDPyî Lezgîn Botanî tewirê dezgehanê Ewropa û rayîrê çareserîye ANFyî rê ercna.

Botanî bale ante ser ke Ewropa babeta tecrîdî de mesuldar a û vat: ''Konseya Ewropa, Yewîya Ewropa, Komîteya Wezîran a Konseya Ewropa, CPT, Mehkemeya Heqanê Merdiman a Ewropa (MHME) mîyanê îmtîhanêkê cidîyî de yê. Nê dezgehê ke erjanê huqûqî yê Ewropa temsîl kenê, şantajanê Tirkîya ver de sereyê xo anê war û krîteranê xo rê îxanet kenê. MHME û Konseya Ewropa tim Tirkîya tolere kenê. Bi nê hawayî Konseya Ewropa erjanê xo çin kena.''

Botanî ard ziwan ke Îmrali de vera Abdullah Ocalanî îşkenceyo psîkolojîk û fîzîksel yeno kerdene û vat: ''Avûkat û keyeyî nêeşkenê pêvînayîşî bikerê. Îmrali de sîstemêkê îşkenceyî awan bîyo. Vera Birêz Ocalanî metodê îşkenceyî yê giranî dewre de yê. No raporanê CPTyî de zî amebi eşkerakerdene. Odaya ey 24 saetan yena teqîbkerdene. Sîstemê Îmraliyî sîstemêkê îşkenceyî yo mîyanneteweyî yo. Tecrîd nika pêro zîndanan rê vila bîyo. Vera sîyaset û dezgehanê kurdan zî tecrîd yeno kerdene. Hêrişê vera kurdan û îşkenceyê Îmraliyî yewbînan ra cîya nîyê.''

Botanî îfade kerd ke sîyasetê Ocalanî berê haştîye akeno, hêvî û çareserîye danê komelan û vat: ''Birêz Ocalan lîderêk o ke dînamîkanê Rojhelatê Mîyanênî zaneno, fikrê ci yenê qebulkerdene û tesîr kenê. Tecrîdê Îmraliyîseba şaran netîceyanê giranan xo de ano. Dewleta tirke vatêne 'Ma do PKKyî mîyanê 3-5 mengan de çin bikerê' la wina nêbi. PKK têgêrayîşêkê şarî yo. Çar parçeyanê Kurdîstanî û xeylêk cayanê dinya de ameyo qebulkerdene.''

Botanî peynî de vat ke heta ke Rayberê Şarê Kurdî ra agahîye bêra girewtene ganî şarê kurdî û dostê înan tedaya komelkîye giran bikerê û nêrazîbîyayîşê demokratîkî xurt bikerê.''