PKK 1993 ra nata Almanya de qedexe yo. Avûkatî Dr. Lukas Theune û Dr. Peer Stolle ewro nameyê PKKyî ser o bi hawayêkê fermîyî do Wezîrîya Karanê Zereyî rê muracat bikerê ke no qedexe wedarîyo.

Pêvînayîşî ra dima wird avûkatî do Berlin de kombîyayîşê çapemenîye bikerê. Xeylêk dezgehê kurdan zî do tewrê kombîyayîşî bibê.

Rojnameyê Tagesspiegelî bi sernameyê 'Rixmê hêzê Tirkîya yê Almanya  PKK wazeno bibo legal' bale ante muracato ke do ewro seba wedarnayîşê qedexeyê vera PKKyî bêro kerdene ser. Xebera ke hetê Hannes Heine ra ameya amadekerdene de qedexeyê vera PKKyî, serebûtê peyênî yenê ercnayene û yeno vatene ke no zîyaret do zor bido têkilîyanê Berlin-Anqara.

Rojnameyî vist vîrî ke 2015 de Hemserekê Konseya Rayberdişî ya KCKyî Cemîl Bayikî seba ke serranê 90an de Almanya de tay serebûtê şîdetî qewimîyabî uzrê xo hukmatê Almanya ra waşto. Rojnameyî bale ante ser ke 2014 de têkoşînê PKKyî yê vera DAÎŞî ra dima lîderanê CDUyî ra Volker Kauderî vatbi 'Ganî ma çeke bidê PKKyî' la hêzanê asayîşî no nêwaştbi.

Avûkatanê PKKyî ra Dr. Peer Stolleyî rojnameyî rê qisey kerd û vat: ''Ma vînenê ke seba wedarnayîşê nê qedexeyê bêmanayî şansêk est o. PKK nika Almanya de yew têgêrayîşê bi şîdetî nêkeno. Eke Wezîrîya Karanê Zereyî muracatê ma rê cewabêkê negatîfî bida ma do şorê Mehkemeya Îdare ya Federale. Hetê bînî de Wezîra Karanê Teberî Annalena Baerbocka ke xeta femînîste ser o sîyaset kena, ganî PKKyî asteng mekera.''

Rojnameyî vist vîrî ke Baerbocke par dima ke endamê DAÎŞî yê ke hemwelatîyê Almanya yê, teslîmê hukmatê Almanya ameybî kerdene vatbi 'Ma Îdareyê Xoserî yê Kurdan rê sipas kenê.''

Rojnameyî xebere de ca da ercnayîşanê burokratêko/a ke nêwaşt nameyê ci eşkera bibo. Burokratî/e îfade kerd ke muracatê avûkatan ra dima Anqara do têbigêra, Berlin de dîplomatê Tirkîya do aktîf bibê û Îstîxbaratê Tirkîya MÎT bikero ke tesîrê xo serê partî û dayîreyanê almanan de bizêdîno.

Burokratî da zanayene ke MÎT Almanya de bi hawayêkê xurtî xo rêxistin keno û vat: ''Dewleta tirke herêma kurdan de 40 serrî yo şer kena û nê şerî de serkewte nîya. Herême de seba PKKyî yew sempatî est a. Beno ka Anqara sîyasetêkê bînî biceribna.''