Wezîrê Karanê Zereyî Suleyman Soyluyî Wekîla HDPyî ya Agirî Dîlane Dîrayet Taşdemîr hedef kerdbi. Taşdemîre derheqê îdîayan de wekîlan û Serekwekîlê Koma HDPyî Saruhan Oluçî reyde merkezê partî de kombîyayîşêkê çapemenîye kerd.

Taşdemîre pare kerd ke partîya înan bîye hedefê hêrişan ê giranan û şîdetê îqtîdarî. Taşdemîre vat: ''Vera partîya ma propagandaya reşkerdişî esta. Çimeyê îqtîdarê zûr û îftîra yê. Wezîrê Karanê Zereyî 16ê sibate de Meclîs de herinda ke derheqê operasyonê Garê de hesab bido partîya ma kerde hedef û vat 'Meclîsî ra yew şîya Garê.' 4 rojan ra dima o vejîya verê kanalêkê televîzyonî û saetêke pê HDPyî heqaret kerd. Dima nameyê mi ard ziwanê xo la îsbatêk nêmojna. Îdîayê Soyluyî zûr û îftîra yê. Eke destê şima de dokument û agahîyê winasênî estê çira to televîzyon de eşkera kerd? Seba eşkerakerdişê ney ti çira heta operasyonê Garê vindertî? Ma sebebê ci zanenê. No seba pawitişê îqtîdarê xo xîret o. Coka şima her oje ma rê îftîrayan kenê. ''

Taşdemîre wina dewam kerd: ''Eke Soylu nê îdîayanê xo îsbat nêkero zûrker o.  Ma nê îdîayanê ey qetî qebul nêkenê. Reyna ez persena; ez key, kamyew roje şîya Garê? Bi dokumentêk eşkera bikerê. Mi rê hîkayeyan mevajê. Hulusî Akarî Meclîs de eşkera kerd ke ê bi zor û zehmetîyan resayî Garê. Ez senî şîya, key uja de dîyaya û key agêrîyaya? Gelo mabênê Îstanbul û Garê de seferê teyarayan esto hayîya ma pê çin a? Soyluyî qala dîmenan kerdêne. Dîmenî hê ça de yê?''

Taşdemîre ard ziwan ke Soyluyî nê îftîrayî eştî milê pêro cinîyan û vat: ''Ez nê îftîrayan sey vera têkoşînê cinîyan vînena. Têkoşînê ma do peynîya nê ferasetê sîyasetî bîyaro. Tîya de ez ana ziwan. Ez nêşîya Garê. No eşkera yo. Nê îdîayî zûr û îftîra yê.''