Têgêrayîşê Cinîyan ê Azadan (TJA) ra Guldeme Dogan, Buroyê Huqûqî yê Asrinî ra Suzane Akîpa û Wekîla DEM Partî ya Îstanbulî Ozgule Sakî derheqê tecrîdê vera Rayber Apoyî de ANFyî rê qisey kerd.

Aktîvîsta TJA Guldeme îfade kerd ke ganî hêverî komelê Tirkîya faktorê tecrîdî fam bikero û vat: ''Qiseyê sey 'Ez azad a, cuya mi binê tecrîdî de nîya' raşt nîya. Dewlete seba ke tecrîdî normalîze bikera komelî manîpule kena. Naye zî bi sîstemê perwerdeyî, qanûnan û medya kena. Cinîyî komel, sîyaset û ekonomî ra yenê tecrîdkerdene. Yanî tecrîd her ca de yo. Coka famkerdişê tecrîdî û têkoşînê vera tecrîdî erkê merdimatîye yo sereke yo. Tecrîd her ca de vejîyeno ma verî. Bi serran o destûr nêdîyeno ke ma Taksîm de çalakîyan bikerê. Seba cinîyah girîng o ke vera tecrîdî xo ver bidê. Seba cuyêka azade û têdûşte ganî tecrîd bêro wedaritene.''

Wekîla DEM Partî Ozgule Sakî ard ziwan ke tecrîd yeno manaya zêdîyayîşê xizanîya cinîyan û qetilkerdişê cinîyan. Ozgule vat: ''Tecrîd de israr polîtîkayê şerê taybetî yê. Huqûq de cezakerdişê rûmetê merdiman sûc o. Ma zanenê ke Îmrali de vera Birêz Ocalanî tecrîd sey polîtîkayêka dişmenî yeno caardene û şexsê ey de şarêk yeno cezakerdene. Babeta çareserîya meseleya kurdan de wedaritişê tecrîdî girîng o. Haştîya mende wina mumkîn bena. Ma zanenê ke îqtîdarê AKP-MHPyî bi rayîrê tecrîdî cinîyan ser de rejîmêkî awan bikero.''

Suzane Akîpa dîyar kerd ke tecrîdê vera Rayber Apoyî bêhuqûqî yo û vat: ''Tecrîd bi xo rejîmêkê zorbazîye yo. Tecrîd sey metodanê peygoşkerdişê meseleyan û teda vejîyeno verê ma. Helbet sebebê tecrîdî yê huqûqî, polîtîk, komelkî, herêmî û globalî est ê. Sîstemê tecrîdî mojneno ke Tirkîya senî qanûnan binpay kena û bi keyfî têgêrena. Ganî tecrîd wedarîyo. Çunke eke Tirkîya xo sey dewleta huqûqî pênase kena ganî qayîdeyanê huqûqî bişinasna û peynîya tecrîdî bîyara. Birêz Ocalan wayîrê ê hezî yo ke bieşko meseleyan çareser bikero. Wedaritişê tecrîdî, şinasnayîşê pêro heqanê ey, caardişê pêvînayîşanê bi keye û avûkatan û qedînayîşê rejîmê tecrîdî do krîzê nikayênî çareser bikerê.''