Tepişteyanê dewaya PKK û PAJKî seba çareserîya meseleya kurdan û azadîya Rayberê Şarê Kurdî Abdullah Ocalanî 27ê teşrîna peyêne de dest pê grevê vêşanîye kerdbi. Tepişteyan 4ê nîsane de safhaya diyîne ya grevê vêşanîye daye destpêkerdene. Tepişteyî mehkemeyan boykot kenê û nêvejîyenê pêvînayîşan û telefonan ser.

Serekê Komeleya Heqanê Merdiman (ÎHD) a Amedî Ercan Yilmazî derheqê grevê tepişteyan de ANFyî rê qisey kerd.

Yilmazî vist vîrî ke 130 rojî yo grevê vêşanîye dewam keno û hetê bînî ra merdimê tepişteyan zî seba destekê grevî Nobeta Edaletî kenê.

Yilmazî da zanayene ke sîstemê tecrîdî yê vera Rayberê Şarê Kurdî goreyê huqûqê zereyî û mîyanneteweyîyî nîyo. Yilmazî vat: ''25 serrî yo Abdullah Ocalan teslîmê Tirkîya ameyo kerdene. Teslîmkerdişê ey ra ver no sîstemê tecrîdî ronîyabi. Heqê Ocalanî yenê binpaykerdene. Coka tepişteyî vera tecrîdî tewir mojnenê û çalakîyan kenê. Sey ÎHDyî ma zaf reyî meseleya tecrîdî ardbî rojdem û muracatê Wezîrîya Edaletî kerdbî. Seba ke şert û mercê Îmraliyî bêrê cigêrayene û tepişteyan de pêvînayîş bêro kerdene muracatî ameyî kerdene. Ma nê hîrê mengan de di reyî muracatê winayênî kerdî la cewab nêdîya ma.''

Yilmazî dîyar kerd ke tecrîd beno sebebê krîzanê Tirkîya û vat: ''Qanûnê Înfazî seba tepişte û hukmwerdeyan tay heqî dayî. Abdullah Ocalanî 25 serrî yo yew di reyî ancax heqê xo yê telefonî şuxilnayê. Heqê ey ê erşawitişê mektuban û girewtişê mektuban yeno xespkerdene. Nê kerdişî benê sebebê krîzî ke no krîz krîzêko sîyasî yo.''