Aktîvîsta Têgêrayîşê Cinîyan ê Azadan (TJA) Eyleme Saruca derheqê hêrişê vera cinîyan ê kurdan, tecrîdê Îmraliyî û kampanyaya 'Bi Jin Jiyan Azadî, Ver bi Azadîye' de ANFyî rê qisey kerd.

Saruca dîyar kerd ke tecrîdê Îmraliyî bi taybetî vera cinîyan pêro komelî rê vila bîyo û vat: ''Ma sey cinîyan ê kurdan tesîrê tecrîdî nêzdîyî ra vînenê. Asta hêrişanê vera Ocalanî çend bizêdîya hêriş û şîdetê vera cinîyan zî hende zêdîyenê. Nê hêrişî teyna vera cinîyan ê kurdan ney vera cinîyan ê Tirkîya zî yenê kerdene. Eke Tirkîya de şorişêk do bêro kerdene do esasê paradîgmaya Birêz Ocalanî de bêro kerdene. Îqtîdarê AKP-MHP-HUDA-PAR û Yeniden Refahî her roje dişmenîya xo ya vera cinîyan eşkera keno. Cinîyî eşkenê bi têkoşînê xo tecrîdê Îmraliyî biqedînê û dişmenîya vera cinîyan çin bikerê.''

Saruca qala kampanyaya 'Bi Jin Jiyan Azadî, Ver bi Azadîye' kerde: ''Kampanyaya ma bi felsefeya Abdullah Ocalanî dîyaye destpêkerdene. Ma bi na kampanya armanc kenê ke pradîgmaya Ocalanî pêro komelî rê bidê şinasnayene. Ma do çarçewa kampanyaya xo de kargehan, komxebatan û kombîyayîşan virazê û nê nînan de qala paradîgmaya azadîgîrîya cinîyan, rêxistinî, têkoşîn û xoverdayîşî bikerê. Felsefeya Jin, Jiyan, Azadî ya ke hetê Ocalanî ra ameya afernayene ewro pêro dinya de yena qebulkerdene. Ma do bi na felsefe xetabanê xo yê rêxistinîye bikerê. Cinîyê Tirkîya hewceyê şorişê cinîyan ê kurdan ê Jin, Jiyan, Azadî yê. Ganî cinîyê Tirkîya zî şorişêkê winayênî bikerê. 

Armancê kampanyaya ma yo verên caardişê azadîya Abdullah Ocalanî yo. Heman wextî de ma armanc kenê ke azadîya cinîyan bîyarê ca, verê qirkerdişê cinîyan bigêrê, têdûştîya komelî awan bikerê, sîstemê serdestîya camêrdan çin bikerê. Seba nînan zî ganî ma kom bibê û xo rêxistin bikerê. Reyna cinîyî eşkenê bi serkêşîya xo pêro hêrişan vindarnê. Ma venga pêro cinîyan danê ke wa tewrê kampanyaya ma bibê.''