Tecrîdo giran ê  serê Rayberê Şarê Kurdî Abdullah Ocalanî dewam keno. CPTyo ke par Îmrali zîyaret kerd, raporê xo 6ê tebaxe de eşkera kerd û bale ante ser ke sîstemê Îmraliyî sîstemê tecrîd û îşkenceyî yo.

Hemsereka HDPyî yê Amedî Hulya Alokmen Uyanika ke vera tecrîdê Îmraliyî hêrsê xo ard ziwan derheqê babete de ercnayîşî kerdî. Uyanike ard ziwan ke sebebê tecrîdî oyo ke Ocalan têna bêro veradayene û komelî ra bêro qerfnayene û vat: ''Wexto ke ma ewnîyenê tewirê ardişê Tirkîya yê Birêz Ocalanî ra, ma vînenê ke sîstemê tecrîdî û polîtîkayê vera kurdan yewbînan rê pabesteyê. Sîstemê kapîtalîstî seba ke Ocalan esîr bêro girewtene plan û projeyê xo kerdbî. Birêz Ocalan hema ke nêardiyabi Tirkîya sîstemê tecrîdî amebi amadekerdene. Birêz Ocalan bi serran Îmrali de têna ame tepiştene ke destur nêdîya ke keye û merdimê ci ey vînî. Modelê Îmraliyî qet cayêkê dinya de  çîn o.''

Uyanike vîst vîrî ke tecrîdê vera Ocalanî 21 serrî yo bi hawayêkê sîstematîkî dewam keno û best pa: ''Têkoşîn û xoverdayîşê şarê kurdî derehqê tecrîdî de ge-ge dewlete rê gamî dayî eştene. Xoverdayîşê şarî tecrîd rey rey kerd şenik û Ocalanî avûkatanê xo dir pêvînayîşî kerdî. La tecrîd çirey nêqedîya. Ewro tecrîdê Îmraliyî heme welatî ra vila bîyo. Heta ke meseleya kurdî mero çareserkerdene Tirkîya de meseleyê bînî zî do merê çareserkerdene. Derheqê çareserkerdişê meseleya kurdî de muxatap birêz Ocalan o. Tesbîtê CPTyî yê derheqê Tirkîya muhîm ê la qîym nêkenê.  CPT reya verêna ke tecrîdê Îmraliyî qebul keno la raporê xo 16 aşman ra dima eşkera kerd ke nê wextî tecrîd xorîyêr bi. CPT û dezgehê Ewropa gerek şirê Tirkîya ser ke wa tecrîd biqedîyo.''