Zîndanê Boluyî de tepişteyê nêweşî Mehmet Hanefî Bîlgîno ke qezaya Dara Hênî ya Çewlîgî ra bi,  30ê çeleyî de dinyaya xo bedilnabî. Embazanê ci yê koxûşî bi mektubêke pare kerd ke mergê ci ra 2-3 rojan ver Bîlgîn nerehet bi la îdareyê zîndanî o nêberdo revîr.

Avûkatanê Komeleya Huqûqnasan a Seba Azadîye (OHD) Emrah Barano ke tim Zîndanê Boluyî zîyaret keno, ard ziwan ke Bîlgîn mergî ra verî 3 rojan koxûş de nîşaneyê Korona mojnayê la ci rê mudaxele nêame kerdene. 

Baranî da zanayene ke 27ê çeleyî de koxûşê Bîlgînî de 7 tepişteyî pê Korona kewtbî la îdareyê zîndanî waştişê tepişteyan qebul nêkerdo. Baranî vat: ''Tepişte  Ahmed Îbrahîm Abdî 27ê çeleyî de nêweş beno, roja bîne Cabbar Palabiyil û Mehmet Hanefî Bîlgîn nêweş benê. Tepişteyan waşt şorê revîr la îdareyê zîndanî no qebul nêkerdo û înan rê test zî nêkerdo. Îdareyê zîndanî mesuldarê mergê Bîlgînî yo. Înan bi zelalî heqê cuye yê Bîlgînî binpay kerd. 

Gardîyanî zî goreyê tedbîranê vera Korona tênêgêrayê. Goreyê vateyanê tepişteyan gardîyanan jan mîyanê koxûşan de vila kerdo. Mehmet Hanefî Bîlgîn nêweşo kronîk bi, verî zî anjîyo bibi.  Mergê ci ra pey ey rê test ame kerdene. Reyna Zîndanê Boluyî de xeylêk tepişteyî pê Korona kewtê.''

Baranî bale ante ser ke Serdozgerîya Komare ya Boluyî derheqê mergê Bîlgînî de tehqîqat dayo destpêkerdene û vat: ''Heta nika têna îfadeyê embazanê koxûşî yê Bîlgînî ameyê girewtene. Goreyê agahîyanê ke resayê ma destî hema zî îfadeyê gardîyanan nêame girewtene.''