Bajarê Kolnî  yê Almanya de semedê Ali Haydar Kaytan û Riza Altunî yê ke ronayoxanê PKKyî ra yê, komeleya kurdan de tezîye ameye ronayene.

Waya Riza Altunî Zohre Altune û warzayê ci Nurdogan Aydogan, wayê Ali Haydar Kaytanî Selma û Feride Kaytan tehzîyeyî qebul kerdî. Heserekê  KCDK-E Zubeyde Zumrut û Engin Sever û temsîlarê Merkezê Komelê Demokratîkî yê Kurdan, sîyasetmedar, hunermend, rojnameger, nuştox, û xeylê kesî tewrê ci bîyî.

Heyata tehzîye de beyraqa PKKyî, fotografê Rayber Apoyî û fotografê Riza Altun û Ali Haydar Kaytanî ameyî daliqnayene. Reyna semedê wird şehîdan seba ke hemrayê ci yê têkoşînî û kurdîstanijî hîsanê xo binunî defter ame ronayene. Badê rêzgirewtişê semedê şehîdan hemserekanê KCDK-E qisey kerd. Qiseykerdişan kongreya PKKyî ameye selamkerdene û ame vatene ke kurdî do wayîrê têkoşînê şehîdanê xo bivejê. Dima ra keyeyanê Riza Altun û Ali Haydar Kaydanî qisey kerd.

Zohre Altun: Rizayî rê çeka verêne dayîka mi girewt

Waya Riza Altunî Zohre Altun nê vatî:  ''Gama ke Rizayî 52 verî dest pê têkoşînî kerd dayîka mi ci rê çeka verêne girewt û  vat 'şo Kurdîstan de şer bikerê Anqara de nê. Pê şerê Anqara ti nêeşenê ser bikewî.'  Riza şi Kurdîstan. Gama ke peyser ame. Dayîka mi vat, 'Riza to çend fasîtî mirnayî.' Dayîka mi ra vat, 'mermîyê mi qedîyayî.' Dayîka mi vat 'ez to rê mermîyan gena, ti helgo şer bikere.' Peyê Rizayî de dayîka ci, apê ci û xora Rayber Apo bibî. Înan şer kerd û zerrîya şarî de cayê xo girewt. Ma şarê xo ra wazenê ke wa wayîrê têkoşînê înan bivejê. Şer rehat o, haştîye zor a. Nê demê haştîye de wa şarê ma wayîrê têkoşînî bivejîyo.''

Feride Kaytan: Têkoşînê Înan do dahîna gird bo

Feride Kaytan zî nê vatî: ''Ê nêmerdî. Nê têgêrayîşî na cumle qebul nêkerd. Têkoşînê înan do dahîna gird bo. Pelo newe do bi serkewtişî bêro tacîdarkerdene. Merdimê rindî tewrê nê têgêrayîşî bîyî! Mîyanê keyeyê ma de ge ge wexto ke qala embaz Futatî bena, vanê o zaf zanaye bi. Xora tewr zanayeyî tewrê têgêrayîşî bîyî. Coka şar aşiqê înan bi, dormeyê înan de bi çember. Têgêrayîşê PKKyî çîyo ke vano ano ca. 7 serrî yo ez pê nê dejî payra ya.  Qesas mi payra tepişeno. Sozo ke ma dayo şehîdan û Rayberîya xo mi payra tepişeno.''

Aydogan: Têkoşînê înan ê 52 serran rayîrê ma akerd

Warzayê Riza Altunî rojnameger Nurdoxan Aydogan zî şexsê Kaytan û Altunî de şehîdê menga gulane yad kerdî û nê vatî: ''Têkoşînê înan ê 52 serran mojna ma ke ma senî têkoşîn bikerê û biciwîyê. Ma do sey keyeyanê ci, înan teqîp bikerê. Ma çew sîya giremedo, înan dima mebermo. Gerek ma têkoşînê înan xurt bikerê. Ma soz danê ke ma do têkoşînê înan heta peynî bidomnê.''

Selma Kaytan zî derheqê kesayet û têkoşînê Ali Haydar Kaytanî de qisey kerd.

Programê tehzîye bi qiseykerdişê Şenge Kahraman dewam kerd. Dima ra hunermend Şîyar Munzurî şîîra Ali Haydar Kaytanî wend û roja verêne ya tehzîye qedîyaye.