Tepişteyanê PKK û PAJKî 27ê teşrîna peyêne de zîndananê Tirkîya û Vakurê Kurdîstanî de vera tecrîdkerdişê Rayberê Şarê Kurdî Abdullah Ocalanî û binpaykerdişê heqanê tepişteyan grevê vêşanîye dabi destpêkerdene. Grevê vêşanîye bi koma 5. roja 26. de dewam keno.

Zîndanê Alanya de zî Hatîce Çakmak, Nîda Kutlu, Zelale Başboga, Şukrane Ozer, Şeyma Kantarci û Sudane Guven grevê vêşanîye de yê.

Tepişteyan bi rayîrê telefonî keyeyanê xo reyde derheqê rewşa xo de qisey kerd.Tepişteyan eşkera kerd ke seba ke înan grevî ser o waştişname dayo Wezaretê Edaletî derheqê înan de bi îdîaya 'propagandaya rêxistine' tehqîqat ame akerdene. Çarçewa tehqîqatî de 4 tepişteyan ê cinîyan rê cezaya hucreyî ya 11 rojan dîyaye û 3 cinîyan rê zî cezaya înfazî dîyaye.

Babîyê Sudane Guven Abdulvahap Guvenî îfade kerd ke kênaya ci nê binpaykerdişan ser o qisey kerd: ''Nê zîndanî de 8 tepişteyê sîyasîyî estê. Di embazî nêweşîye ra grev nêkenê. Seba ke ma grevê vêşanîye kenê tedaya vera ma zî zêdîyaye.''

Abdulvahap Guvenî vat ke cezaya hucreyî ya 11 rojan dîyaye 4 tepişteyan û wina dewam kerd: ''Zîndan de prosesê pandemî de zî hacetê pakîye nêdîyenê înan, heqê înan ê sosyalî yenê binpaykerdene, kitab û rojnameyî nêdîyenê. 2 tepişteyanê nêweşan goreyê îmkananê xo koxûş kerd pakî. Heqê înan ê telefonî 20 deqa yo la îdare têna seba 3 deqayan verdeno. Grevê vêşanîye birêka raşt a. Herinda ke heqê tepişteyan bêrê dayene, vera înan hêriş yeno kerdene.''