Hemsereka Komeleya Cigêrayîşanê Kurdan Remzîye Alparaslan bi wesîleya 21ê Sibate Roja Ziwanê Dayîke ya Dinya ANFyî rê qisey kerd.

Remzîye da zanayene ke seba ke kurdkî aver şora xîretî yenê kerdene la nê xîretî qîm nêkenê. Remzîye vat: ''Ganî ziwan bieşko hewcedarîyanê cuye rê bibo cewab. Eke ziwanêk cewab bido hewcedarîyanê şarî û têkilîye o çax pê qiseykerdiş beno. Têkoşînê kurdkî zî rixmê zorbazî, astengî û tedayan têkoşînêko muazam o. La ziwanêk eke çend cayan de bêro şuxilnayene aver nêşino. Eke pêro xebatî bi kurdkî bêrê kerdene o çax ziwan aver şino.''

Hemsereke Remzîye ard ziwan ke rewşa nikayêne ya kurdkî zî mîyanê astengî û qedexeyan de biba zî xo rê derfetan awan kena û vat: ''Rewşê xirabî yê sey koçkerdiş, şîdetê dewlete û nêdayîşê perwerdeyê bi ziwanê dayîke estê. Rixmê nê çîyan zî ma eşkenê vajê ke no ziwan xîret keno ke dînamîk bimano û biciwîyo. Ziwan hetêkê bînî ra kodêko kulturel o. Seba ke kurdkî zêdêr aver şora, mabênê neslan de ganî mîyanê cuye de vila biba. Têkoşînî ra heta yarîyan ganî her çîyê ma bi kurdkî bibo.''