Temel: Ma do îtîfaqê demokrasî rêxistin bikerê

Hetkarê Hemserekanê Pêroyîyan ê HDPyî Tayîp Temelî ard ziwan ke şar mecburê 'holê xiraban' nîyo û bale ante rayîrê hîrêyînî ser. Temelî vat: ''Çew mecburê faşîzm, krîz, rijîyayîşî nîyo û yewîya demokratîke alternatîfa ma ya.''

Vengdayîşê HDPyî ser o 8 partîyê sîyasî bi şîarê 'Têkoşînê Hemparî' ameybî pêser. Hetkarê Hemserekanê Pêroyîyan ê HDPyî Tayîp Temelî no kombîyayîş ANFyî rê ercna.

Tayîp Temelî îfade kerd ke şar mecburê îtîfaqanê Milet û Cumhurî nîyo û vat: ''Şar mecbur nîyo ke holê xiraban biweçîno. Şar wayîrê îradeyê xo yo. Coka hedefê ma yo bingeyî no yo ke ma rayîrê hîrêyînî yan zî bi nameyêkê bînî îtîfaqê demokrasî vejê vernîya şarî. Şarî heta nika rejîmê kemalîstan, rejîmê îslamîstan, rejîmê cûnta ûsn. ceribnayî la sîyaseto demokratîk nêceribnayo. Ma bi rayîrê hîrêyînî yan zî bi îtîfaqê demokrasî yewîya cîyatîyan ra qal kenê. Seba ke îtîfaqanê cumhur û miletî şarî rê polîtîkayê demokrasî pêşkêş nêkerdî ma sere da nê rayîrî û no kombîyayîş kerd.

Nika ma têhet vindenê, nika ra ma nêeşkenê qala îtîfaqî bikerê. Beno ke dima na yewîye bivurîya itîfaqî. Ma têna seba weçînayîşan bi nê hawayî tênêgêrenê. Tirkîya de nika krîzê pîlî estê. Hedefê ma yo eşkera no yo ke bi yewîya xo heqê nê krîzan ra berê. Îtîfaqê demokrasî armanc keno ke vera polîtîkaya krîz û rijîyayîşan demokrasîya radîkale rono. Çew mecburê faşîzm, krîz, rijîyayîşî nîyo û yewîya demokratîke alternatîfa ma ya.''