HDP do 15ê hezîrane de rayraşîyayîşê demokrasîyî bido destpêkerdene. HDP do Edîrne ra heta Colemêrgî  dest pê rayraşîyayîşî bikero û rayraşîyayîş 20ê hezîrane de Anqara de do biqedo. Wekîlê HDPyî yê Wanî Tayyîp Temelî derheqê rayraşîyayîşî de qisey kerd.

Temelî ard ziwan ke sebebo tewr pîl ê nê rayraşîyayîşî destsernayîşê wekilîyan o. Temelî no destsernayîş sey darbe ercna. Temelî vat: ''Weçînayîşê 31ê adare de AKPyî vatbi ê do reyna qeyûman tayîn bikerê. La şarî reyna reye nêdaye AKP. Şar vera destsernayîşê şaredar û wekilîyan hêrsbîyaye yo. Seba ke hesabê ci biperso wayîrê HDPyî vejîyeno.

Ma verê cû dokumentê tewirî eşkera kerdbi. Her kes têna yo her kes îqtîdarî ra hêrsbîyaye yo. Eke her kes bêro têhet ma eşkenê pîya hesab bipersê. Wexto ke ma no tewir geş kerdêne dest nîya wekilîya wekîlanê ma ser.''

Temelî da zanayene ke koordînatê rayraşîyayîşê Edîrne û Colemêrgî tay sembolîk ê û vat: ''Leyla Guven wekîla Colemêrgî ya ke wekilîya ci batal bîye. Seba ke ma dişmenîya vera kurdan deşîfre bikerê ma cayê tewr nêzdî yê meseleya kurdan nîşan kenê. Edîrne ewro bi sembolê darbeya sîyasî ya vera şaranê Tirkîya. Selahattîn Demîrtaş uja de zîndan de yo. Sembola xoverdayîşê cinîyan Fîgene Yuksekdag, Gultene Kişanak, Sabahate Tuncel zî zîndananê Edîrne de tepişte yê.

Ma Tirkîya benê Colemêrg Kurdîstan zî benê Edîrne ke wa bêro eşkerakerdene ke HDP Tirkîyayêka senîne wazeno. Ma vera vîrusê Korona tedbîrê xo girewtî. 

Rayraşîyayîşê ma  'vera darbeya rayraşîyayîşê demokrasîyî', vera rewşa nikayêne ya şaranê Tirkîya û Vakurê Kurdîstanî yo ke tarîtîye û destsernayîşan rê mehkum bîye, seba awankerdişê demokratîkî yê Tirkîya yo. Coka ma qerardar ê ke rixmê pêro astengîyan zî rayraşîyayîşê xo bîyarê ca.