Hemserekê Pêroyî yê HDP‘yî Sezaî Temellî akerdişê kombîyayîşê hemserekan ê bajaran ê partîya xo de qisey kerd.

Temellî ard ziwan ke tecrîdkerdişê Rayberê Şarê Kurdî Abdullah Ocalanî temamê welatî zî ameyo tecrdîkerdene û vat:’’5'ê Nîsane 2015'î ra nat ma bale ancenê tecrîdî ser. Ma vat, heta ke tecrîdê Îmraliyî dewam bikero no welat do huqûqî  û edaletî ra dûrî bikewo. Çi heyf ke nê vatişê ma zî raşt vejîyayî.

LEYLA GUVENE Û GREVÊ VÊŞANÎYE

Hemserekê Pêroyî yê HDP‘yî Sezaî Temellî vist vîrî ke grevê vêşanîye yê Leyla Guvene roja 92’ine de yo û vat “Na merhaleyêka zaf krîtîk a. Roje bi roje rewşa weşîya Leyla Guvene xirabêr bena. No rî ra ganî ma berey nêmanîme. Seba ke vengê Leyla Guvene her ca de bêro heşnayene, çi destê ma ra yeno û berpirsîyarîya ma çi ya ganî ma wezîfeyê xo bîyarîme ca. Ma Meclîsî de di rojî nobeta edaletî, haştî û demokrasî girewte û waşt ke bale biancîme serê grevê vêşanîye. Kar û barê ke ganî hukmat nê warî de bikero, ma vîst vîrî. Hîna zî xo nanê kerrîye. Êyê ke grevê vêşanîye peygoş kenê, teyna persan gird nêkenê, cuya hevalanê ma yê ke grevê vêşanîye de yê zî erzenê mîyanê riskî. Eke rewşêka xirabe biqewimîya berpirsîyarê naye îqtîdar bi xo yo.

Temell bale ante ke, no îqtîdar huqûqî talan keno û vat: “Waştiş eşkera yo: Ganî Birêz Ocalan bieşkewo keye û avûkatanê xo reyde pêvînayîşan bikero. Nê  waştişan nêvînayîşî ra meyîş talankerdişê huqûq û edaletî yo. Nê teyna ma nêvanîmê. Yewîyîya Parlamenteran ya Konseya Ewropa zî qeraranê xo de no teyîd kerd. CPT nê babetan de xebitîyeno. Seba çareserkerdişê na bêhuqûqîye ganî pêvînayîşê  keye û avûkatan reyde dest pêbikerê.”

Sezaî Temellî ard vîrî ke, teyna Leyla Guvene nê, 300 zêde girewteyî hepisxaneyanê Tirkîya de grevê vêşanîye de yê û ne nêeşkenê vîtamîn bigêrê, ne zî mîyanê şert û mercanê başan de eşkenê çalakîya xo dewam bikerê.

Temellî çalakwanê grevê vêşanîye yê Strasboûrgî  û Sebahat Tûncele, Selma Irmake û heme çalakwananê grevê vêşanîye rê silan şawit.

‘MA EŞKENÊ VERÊ NA REWŞE BIGÎME’

Dewamê giseykerdişê xo de Temellî ard ziwan ke, dadgerî bi fermananê ke Qesra Erdoganî ra yenê tê gêrênê û va, “Bêhuqûyî her ca girewto xo dest, şar bêveng o û na bêvengîye ma tersnena. Ma vengdayîş kenê êyê ke demokrasî, haştî, azadî, edalet wazenê û wayîrê wijdanî yê. Ma eşkenê verê na rewşe bigîmê. Seba naye zî ganî ma goş bidîme wijdanê xo ser.”