Serekwekîlê Koma DEM Partî Sezaî Temellîyî netîceyê weçînayîşanê 31ê adare ANFyî rê ercnayî.

Temellîyî dîyar kerd ke meseleyanê perwerde, weşîye, îdare û ekonomîyî netîceyê weçînayîşan eşkera kerdê û vat: ''Mîyanê nê faktoran de oyo tewr bitesîr meseleya kurdan a. Seba ke AKPyî meseleya kurdan de çaresernêkerdiş ferz kerd, xîret kerd ke sîyasetê demokratîkî tasfîye bikero û bi ferasetê qeyûmî welatî îdare bikero krîzî bîyî pîlêr.''

Temellîyî bale ante weçînayîşanê 2028î ser û vat: ''Seba ke têkoşînê demokrasîyî ser bikewo ganî muxalefet û hêzê demokrasîyî netîceyanê weçînayîşanê 31ê adare hol biercnê û cepheyê têkoşînî pîlêr bikerê. Eke wina bikerê Tirkîya do bieşka demokratîk biba. Coka heta 2028î ma bi xurtî do têkoşîn bikerê.''

Temellîyî îfade kerd ke ganî teyna DEM Partî ney partîyê muxalefetî yê bînî zî netîceyanê weçînayîşan ra derse bigêrê. Temellîyî vat ke komel muxalefetî ra paweno ke meseleya kurdan çareser bikero û vera şerî vejîyo. Temellîyî wina dewam kerd: ''Tirkîya seba demokratîkbîyayîşî dej ancena û tengasîye ra xelisîyayîşê ci mumkîn o. Sîyasetê rayîrê hîrêyînî venga muxalefetî dano. Eke muxalefetî bi perspektîfê çareserîye yê rayîrê hîrêyînî têbigêro tengasîye do bêra çarekerdene. Çareserîya meseleya kurdan seba haştî û aramîya şaranê Rojhelatê Mîyanênî gamêka girîng a.''