Wekîlê HDPyî yê Wanî Sezaî Temellîyî kombîyayîşê lîderanê 6 partîyanê muxalefetî û demokratîkbîyayîşê Tirkîya de girîngîya HDPyî ser o ANFyî rê qisey kerd.

Temellîyî bale ante Îtîfaqê Demokrasî yê HDPyî ser û vat: ''Her îtîfaq wayîrê xerîtaya rayîr û krîteran o. Xeylêk merdimî nêrazîbîyayîşî mojnenê û vanê ke çira kombîyayîşê 6 lîderan de veng nêdîya HDPyî. Ez ney normal vînena, çunke waştişê ma yo winasên çin o. Weçînayîşê Serekkomarîye zaf girîng o. Bêguman nê weçînayîşî de mîyanê îtîfaqan û teberî îtîfaqan de vera îqtîdarî hemleyê girîngî do bêrê eştene. La tek rayîrê demokratîkbîyayîşê Tirkîya, çareserkerdişê meseleyanê nikayênan û xelisîyayîşê tedaya faşîste rayîrê HDPyî yo. Karê ke do îtîaqê miletî bikero û karê ke do îtîfaqê demokrasî bikerê seyci nîyê. Dormeyê yew masa de kombîyayîş nêno manaya çareserîya her çîyî. Hetê stratejîkî ra ma wayîrê ê îmkanî yê ke seba demokratîkbîyayîşê gamanê zaf girîngan bierzê.''

Temellîyî da zanayene ke HDP vera taktîkanê weçînayîşî û manewrayanê sîyasîyan wayîrê tecrubeyan o û vat: ''Têkoşînê ma yê bi serran mojneno ke HDP hêvî dano şaran, kedkar û cinîyan. Bê HDP çew nêeşkeno qala ameyoxî bikero. Ganî muxalefeto komelkî û sîyasî na raştîye cade fam bikerê. Tirkîya hewceyê îtîfaqê demokrasî ya, şar hewceyê îtîfaqê rayîrê hîrêyînî yo. Sebebê krîzanê nikayênan îqtîdaro nikayên o. Coka mîyanê nê atmosferî de hînî yew meşrûtîya îqtîdarî nêmenda. Merdimî zî zanenê ganî hînî nêbo. Oyo ke hêvî dano merdiman HDP yo.''