Koordînasyonê Teqîpkerdişê Grevê Vêşanîye yê Marmara seba ke bale biancê grevê vêşanîye yê tepişteyan ke vera tecrîdê serê Rayberê Şarê Kurdî Abdullah Ocalanî yena kerde eşkerayîyêke daye.

Eşkerayîya ke Komeleya Heqanê Merdiman (ÎHD) ya Îstabulî de ameye kerdene temsîlkarê Komeleya Huqûqnasanê Seba Azadîye (OHD), Weqfa Heqanê Merdiman a Tirkîya (TÎHV), Komeleya Paştdayîş û Hetkarîye ya Keyeyanê Tepişteyan û Hukmwedeyan a Marmara (MATUHAY-DER), Sendîkaya Kedkaranê Weşîye (SES) û  Komeleya Huqûqnasan ê Modernan (ÇHD) yê Îstanbulî tewrê ci bîyî.

Endamê Heyetê Rayberdişî yê TîHVyî Umît Bîçerî ke eşkerayîya hempare wende vist vîrî ke gerê vêşanîye roja 97. de ya û vat: ''Serra 2000î ra nata bitaybetî Îmarali de zîndanan de tecrîd sîstematîk yeno caardene. Xora hetê bînî ra zî bi bahaneyê pandemî îzolasyon û tecrîd merhaleya îşkenceyî de yê. Tecrîd hînî zîndanan ra heme welatî ra vila bîyo. Tepişteyî pê grevê vêşanîye dewlete hîşar kenê û wazenê komel vera nê qewimîyayîşan bibo hîsgêr. Ma do seba ke waştişê tepişteyan bêrê caardene xebatanê xo hîna bitesîrî bidê domnayene. Ma veng  danê rayapêroyî ke wa vera rewşa tepişteyan a ke binê tehluke de ya bêveng memanê. ''

Badê eşkerayîye temsîlkarê dezgehan zî yew bi yew qisey kerd û waşt ke waştişê tepişteyan ê heqdar bêrê caardene. Qiseykerdişan de ame vatene ke tecrîdo ke 22 serrî yo Îramli de yeno caardene binpaykerdişê heqan o. Temsîlkaranê dezgehan veng da îdarekaranê hukmatî ke wa perpirsîyarîya xo bîyarê ca û tecrîdî wedarê.