Tepişteyê bi nameyê Îlker Kizilaltuno ke 10 serrî yo Zîndanê Sîlîvrî de tepişte yo, da eşnawitene ke 15ê tebaxe ra nata rojeyê mergî de yo.

Cinîya Îlker Kizilatunî Bahare Kurt Kizilaltun bi rayîrê vîdeoyî da zanayene ke mêrdeyê ci 15ê tebaxe dest pê rojeyê mergî kerdo. Bahare pê hesna ke mêrdeyê ci îfadeyanê îtîrafkerî/e ra 10 mengî yo Zîndanê Sîlîvrî de tepişîyeno û vat: ''Waştişê mêrdeyê mi û ê Sîbele Balaç û Gokhan Yildirim heman ê. Mêrdeyê mi verî ke bêra muhakemekerdene tepişîyeno û hucreyêk de yeno tecrîdkerdene. Heqê muhakemebîyayîşê edîlî bi temamî wedarîyayo. Pêro muracatê ma zî ameyê redkerdene.''

Bahare Kurt Kizilaltun pare kerd ke waştişê mêrdeyê ci Îlker Kizilaltunî wina yê:

''-Muhakemekerdişê bi delîlanê dîjîtalan, bi şahîdanê nimiteyan û îtîrafkeran wa biqedo.

-Wa zîndanan de cezaya dîsîplînê bikeyfî biqeda.

-Ganî tepişteyê nêweşî bêrê veradayene.

-Wa kitab û kovarî bêrê dayene.

-Ganî zîndanan de heqê sohbetî bi temamî bêro caardene.

-Ganî cezaya zîndanî ya vera ma bêra betalkerdene.

-Ganî qanûnê cezaya muebede ya girankerde bêro vurnayene.

-Wa înfazî nêrê vêşnayene û surgunî biqedê.''