Tepişteyanê Zîndanê Edîrne bi mektubêke bale ante astengkerdişê heqanê tedawî yê 5 tepişteyan ser ke nê tepişteyî Abdulrahîm Demîr (60), Ferzende Erbî (72), Abdullah Ateş (70), Ehettîn Kaynar (72) Kerîm Boran (81). Hezîrana 2018î de seba ke Komîsyonê Edaletî de ca girewtêne bi îdîaya 'endamîya rêxistine' û 'xirakerdişê yewîya dewlete' cezaya muebede dîyaye nê kesan.

Tepişteyanê Zîndanê Edîrne Gabar Denlî, Yilmaz Bulut, Mazlûm Akdag, Huseyîn Aydin û Fuat Taşî Şubeyê Îstanbulî yê ÎHDyî rê mektube şawite. Mektube de ame vatene ke tepişteyî nênê tedawîkerdene û rewşa weşîya înan her ke şina bena girane. Tepişteyan vist vîrî ke tepişteyê bi nameyê Îbrahîm Akbaba û Hadî Yalçin zî merdî.

Tepişteyan îfade kerd ke beno ke cînayetê komkî biqewimîyê, tepişteyê nêweşî nênê berdene bi nêweşxaneyî, dermanê înan erey dîyenê, wexto ke nêweşîye hînî nêeşkena bêra tedawîkerdene prosesê tedawî dest pêkeno.

Mektube de ame vatene ke kelemçeyî wextê sewqê nêweşxaneyî de tepişteyan rê yenê ferzkerdene. Tepişteyan pare kerd ke Ehettîn Kayar, Kerîm Boran, Ferzende Erbî, Abdulrahîm Demîr nêweşîyanê xo û kokimîye ra nêeşkenê bi sereyê xo cuya xo rê dewam bikerê û ganî cade bêrê veradayene, ganî dermanê înan bêrê dayene, pê ambulansî bêrê berdene bi nêweşxaneyî û keyeyanê xo rê nêzdî de zîndanêk de bêrê cakerdene.