Erdlerzî ra dima xeylê tepîşteyan rê îşkence ameybî kerdene. Ê kesan ra yew zî Yaşar Savci yo ke zîndanê Turkoglu yê Mereşî de mendêne û dima sewqê zîndanê Kavakî yê Samsûnî bî. Savciyî telefonê keyeyê xo kerd û da zanayene ke heta nika înan rê çi îşkence ame kerdene.

‘Ê bane kerdî û bi saetan îşkence kerdî’

Maya Savciyî Hanîfe Savci (49) ard ziwan ke, gedeyê aye rê bi saetan îşkence ameya kerdene û vat, ‘‘Erdlerzî ra rojêk dima wexto ke înan sewq kenê, rayîr ra înan rê îşkence kenê. Rayîr ra ereba vindarnenê û înan peya kenê. Cilanê înan vejenê û înan bane kenê. Danê înan ro û heta ke bibetilîyê îşkenceyê înan kenê. Dima benê zîndan û uca de reyna îşkenceyê înan kenê.

Sacvi da zanayene ke, îşkence hema zî dewam kena û vat ke lajê aye venga avûkatan û pawitoxanê heqanê merdimîye dano ke wa şêrê zîndan.