Grevê vêşanîye yê tepişteyan ê vera tecrîdê Îmraliyî dewam keno. Grevê vêşanîye reyde Zîndananê Meletî û Antalya ra zî xeberê binpaykerdişê heqan yenê.

Zîndanê Antalya

Zîndanê Antalya de tepişte Zelale Akboga bi rayîrê telefonî keyeyanê xo rê qala binpaykerdişan kerde.

Akboga da zanayene ke înan waştişê grevê vêşanîye bi waştişnameyan Wezaretê Edaletî rê nuştî la bi îdîaya 'endamîya rêxistine' cezaya hucreyî ya 11 rojan dîyaye 4 tepişteyan ê cinîyan. Başboga pare kerd ke ê do ceza rê îtîraz bikerê û venga rayaumûmîye da ke hîsger biba.

Babî Îzzettîn Başbogayî zî waşt ke talebê tepişteyan bêrê caardene û vat: ''Nê prosesî de ganî her kes bibo vengê zîndanan.''

Zîndanê Meletî

Tepişte Zeyyat Agaogluyî pê telefonî keyeyê xo de qisey kerd û  ard ziwan ke kalorîferê înan nênê tavistene. Agaogluyî vat: ''Ma cemidîyenê. Seba ke ma rê cezaya rêkilîye dîyaye ma nêeşkenê heqê xo yê telefonî bixebitnê. Ma binê şertanê zoran de çalakîya grevê vêşanîye dewam kenê. Ma venga Komeleya Heqanê Merdiman (ÎHD) danê ke wa heyetêk bêro û zîndan de cigêrayîşan bikero.''