Zîndanê Tîpê Syî yê Antalya de binpaykerdişê heqanê tepişteyan dewam kenê.Tepişte Harun Olmezî pê telefonî keyeyê xo de qisey kerd û înan rê qala binpaykerdişan kerde.

Harun Olmezî pare kerd ke tepişteyê sîyasîyî koxûşanê cîyayan de yenê cakerdene û vat: ''Tay embazê ma seba ke rewşa înan a madîye çin a nêeşkenê televîzyon û dolab bigêrê. Ma meseleyanê xo îdareyî rê vanê la îdare goş nêdano ma. Aktîvîteyê sosyalî qedexe yê. Roje de yew nan dîyayêne ma. Nêrazîbîyayîşan ra dima nika di nanî dîyenê la gramajê înan şenik o. Seba ke werdan de vîtamîn çin o embazê ma nêweş kewenê. Têna 3-4 koçikê werdî dîyeno ma. Ma 10 rojan seba ke embazê ma yê bînî mird bibê werd nêgirewt la çîyêk nêvurîya.

Faturaya ceyranî zaf zêdîyaya. Eke ma rojêke zî fatura nêdê pê birnayîşê ceyranî ma rê gef yeno werdene. Tay koxuşan de ceyran birîya. Coka ê nêeşkenê cay dem bikerê, nan bipewjê. Tay embazê ma rixmo ke cezaya înan qedîyaya vera nêdîyenê. Ma vera ney nêrazîbîyayîşê xo mojnenê la nêeşkenê netîce bigêrê. Ma venga pêro pawitoxanê heqanê merdiman, demokratan danê ke wa vengê ma bieşnawê û bidê eşnawitene.''