Zîndananê Tirkîya de rewşa tepişteyanê nêweşan giran bena. Goreyê raporê Komeleya Heqanê Merdiman (ÎHD) 651ê ci giranî hezarêk û 517 tepişteyê nêweşî est ê. 2021 de tewr tay 46 tepişteyanê nêweşan zîndan de, 3 tepişteyanê nêweşan zî dima ke vera dîyayî dinyaya xo bedilnaye.

Zîndanê Wanî de tepişteyê nêweşî Seyfettîn Demhato ke 8 serrî yo tepişte yo û tede nêweşîya FMFyî est a. Seyfettîn Demhatî zîndan de reyna krîzê qelbî derbaz kerd, wedarîya nêweşxane la reyna erşawîya zîndanî.

Waya Demhatî Şengule Marti ard ziwan ke rewşa kekê aye xirab a û nêweşîya FMFyî ra demarê çimê ey teqayê, nêweşîye kewta mil û paştîya ci.

Şengule Marti îfade kerd ke nêweşîye ra kekê ci di reyî krîzê qelbî derbaz kerdo û vat: ''Xebere nêdîyaye ma ke kekê mi wedarîyayo nêweşxane. Kekê mi verî zî krîzê qelbî derbaz kerd. Ganî kekê mi bêro veradayene û teber de bêro tedawîkerdene. Nêweşîya FMFyî stres, rincanîye zêdînena.''