Zîndanê Bunyanî yê Kayserî de rixmê nêrazîbîyayîşan zî îşkence û kerdişê xirabî dewam kenê. Dima ke rayaumûmîye pê îşkence û nê kerdişan hesîyaye zî îdareyê zîndanî kerdişê xirabî û îşkence zêdînayî.

Nêzdîyê 300 tepişteyê sîyasî bê îradeyê înan Zîndanê Bunyanî ra ameyî surgunkerdene. Keyeyî dima ke gêrayî zîndanî pê hesîyayî ke domanê înan ameyî surgunkerdene. 300 kesan ra 8 kesî surgunê Zîndanê Akçadagî yê Meletî ameyî kerdene. Eşkera bi ke îdareyê Zîndanê Akçadagî û leşkeran nê 8 tepişteyan rê îşkence kerdo.

Tepişteyanê sîyasîyan bi rayîrê keyeyanê xo wina vat: ''Dima ke ma tîya de kişîyayê wa kes fotografê ma berz nêkero, eke çîyêk bêro kerdene wa nika bêro kerdene. Pê vatişê 'No ca zîndanêko herêmî û milî yo. Merg esto, tawîz çin o.' ma rê gef wanenê. Dest nîyeno eşyayanê ma ser.

Embazê ma Mehmet Yamaço ke nêweş o, pê kuwayîşî ame ardene bi verê mergî. Tepişteyê sîyasîyê ke seba înan vajîyayo 'xo kişto' îşkence de kişîyayî. Zîndan de her roje merdimî kişîyenê la îqtîdar ney sey 'xokiştiş' pênase keno. Cuya tepişteyanê sîyasîyan binê asayîşî de nîya. Na babete de ganî rayaumûmîye cade têbigêra. Eke çîyêk bêro kerdene nika bêro kerdene, dima ke ma kişîyayê nê.''