Mehmet Erbey 2009 de Wan de bi îdîaya 'endamîya rêxistine' tepişîyabi û ci rê cezaya zîndanî ya 25 serran dîyabî. Erbeyo ke nika Zîndanê Buca yê Îzmîrî de tepişîyeno waya xo Rojda Erbey rê bi rayîrê telefonî qalê binpaykerdişê heqan kerd.

Rojda da zanayene ke bê xebera keyeyî Erbey Zîndanê Tekîrdagî ra surgunê Zîndanê Buca bîyo û 10 saetan wesayîtê rîngî de şîyo.

Rojda vat: ''Derheqê surgunî de xeberêke zî nêdîyaye ma. Ma muracatê ÎHD û OHDyî kerd. Kekê mi cara newe Duzce ra surgunê Tekîrdagî amebi kerdene. Tekîrdag de zî vera ey rê cezayî dîyayêne. Kekê mi 15 serrî yo zîndan de yo. Kekê mi vat ke şertanê zîndanî ra ey de nêweşîya mîde, gurçik, fitiqî virazîyaya û her zîndan de îşkenceyî ra bedenê ci de texrîbat virazîyayo. Nika Buca de o hucreyê yewkesî de tepişîyeno.

Teyna roje de di saetan ey rê heqê hewagirewtişî dîyeno, o nêeşkeno çewî de têkilîye virazo û rojêke de saetêke eşkeno şoro kitabxaneyî. Yanî o teyna maneno. Ma nêweşîyanê ey ra qerqilîyenê. Ma do verê nê kerdişan de muracatan bikerê. Teyna kekê mi ney 27 embazê ci binê tecrîdî de yê. Ma do tim bibê vengê înan.''