Goreyê doneyanê Komîsyonê Zîndanan ê ÎHDyî Tirkîya de rewşa weşîye yê 458 tepişteyan giran a. Hezar û 334 tepişteyî zî ganî bêrê weşkerdene. Dezgehê Tipê Edlîyî raporê ''Nêeşkenê zîndan de biciwîyê'' da 458 tepişteyan û ganî nê tepişteyî cade bêrê veradayene. La rixmê pêro muracatan zî tepişteyî nênê veradayene.

Herêma Ege de zî rewşa weşîye ya 84 tepişteyan giran a û 261 tepişteyê nêweşî estê. Xeylêk keyeyan Komeleya Paştdayîş û Hetkarîya Keyeyan a Ege (EGE TUHAY DER) rê muracat kerd û hetkarî waşte. Derheqê babete de Hemserekê EGE TUHAY DERî Ahmet Ertaşî ANFyî reyde qisey kerd.

Ertaşî vat: ''Bi taybetî prosesê Korona ra dima binpaykerdişê heqan zêdîyayî. Heqê tepişteyan ê nêweşan yenê astengkerdene. Dest nîyeno heqanê revîr, pakî û kantînî yê tepişteyan ser. Zîndanan de caardişê keyfîyî estê. Bi taybetî tepişteyê nêweşî terkê mergî bîyî.''

Ertaşî bale ante tepişteya Zîndanê Şakranî Fatma Ozbay ser û vat: ''Fatma Ozbay nêweşa kanserî ya la tedawîya ci yena astengkerdene. Ozbaye nêbenê nêweşxane, wexto ke benê zî zîndan de gênê binê karantîna. La Ozbaye nêeşkena bi sereyê xo biciwîya. Ganî yew ardim bida ci. Nêeşkena vera janî xo bipawa. Ozbaye û tepişteyê nêweşî mergî reyde têrî yê.

Sere de Wezaretê Edaletî ez venga pêro selahîyetdaran dana ke tepişteyê nêweşî wa bêrê veradayene. Sena naye ma têkoşînê xo yê demokratîkî do dewam bikerê.''