Bi desan tepişteyê sîyasî Zîndanê Ereglî yê Konya de vera teda û binpaykerdişanê heqan 77 rojî yo grevê vêşanîye de yê. Grevê vêşanîye 16ê teşrîna peyêne ra nata dewam keno.

Zîndanê Ereglî de tepişteyan vera binpaykerdişê heqan û tecrîdê giranî 4ê teşrîna verêne de dest pê grevê vêşanîye kerd û 16ê teşrîna peyêne de zî grev vurna grevê vêşanîye yo bêdor û bêdem.

Tepişteyê grevê vêşanîye hucreyê yewkesî de yenê cakerdene. Reyna zîndan de qedexeyê pêvînayîşî yê mengêke ra dima qedexeyê pêvînayîşê bi telefonî zî dîya tepişteyan. Mîyanê çar mengan de hûmara tepişteyanê ke hucreyê yewkesî de yê resaye 40. Saetanê hewagirewtişî de destûr nêdîyeno ke tepişteyî pîya bimanê. Tepişteyê sîyasî, tepişteyê sîyasîyî û tepişteyê Gulencîyî zî heman cayan de tepişîyenê.

Tepişteyanê Ereglîyî ra Yakup Brukanli 28ê teşrîna verêne de vera tecrîdê girankerdeyî û zêdîyayîşê binpaykerdişê heqan bedenê xo dabi adirî ver.  Brukanliyo ke bedenê ci bi giranî vêşabi, nêame berdene bi nêweşxane û revîr de pê kelemçeyan ame dermankerdene.