Sema Mazlum nameyê tepişteyan mektubêk erşawit û da zanayene ke wextê janî de ê terkê mergî ameyî kerdene û hînî vera ney ê do dest pê çalakîyanê hîşyarkerdişî bikerê. Sema Mazlum ard ziwan ke êyê ke teber de yê zî ganî paştî bidê çalakîyanê înan.

Mektubê tepişteyan de nîşan ame dayene ke jan hetê îqtîdarî ra sey firsendêk yeno xebitnayene; şar keye de ame hepiskerdene, muxalefeto komelkî ame bêvengkerdene, rejîmo zorbaz zêdêr otorîter bi, komel zî zêdêr bi muhtacê dewlete û zîndanêko komelkî ame afernayene.

Mektub de ame vatene ke îqtîdarê AKP-MHPyî bi nê hawayî xîret keno ke estbîyayîşê xo dewam bikero. Mektub wina dewam keno: ''Tedbîrê vera vîrusî sey bahane yenê mojnayene û wazenê ke azadîye werte ra wedarê. Nê tedbîrî seba teda û zorbazîya vera tepişteyan yenê xebitnayene. 

Îmkanê tedawî yê tepişteyanê nêweşan zî ameyî wedaritene. Xeylêk embazê ma yê nêweşî estê ke rewşa înan qerqilnenê. Wextê winasênî de îqtîdarî pê qanûnê înfazî mafya, tecawuzkerî vera dîyayî. Pê qanûnê înfazî qirkerdişêko pîl ame kerdene. Pê nê paketa qanûnî zîndanan de tecrîd, caardişê kêfî û zorbazî zêdîyayî. Cergî ameyî vera dayene la ma tîya de yê. No nêno qebulkerdene. 

Ma wazenê pare bikerê ke ma do zîndanan de dest pê çalakîyan bikerê. Menga hezîrane ra pey hewteyê verênî de bi hawayêkê sîstematîkî Neteweyanê Yewbîyayeyan, Rêxistina Efû, ÎHD, Serekîya Meclîsî, Wezaretê Edaletî û Serekomarî rê waştişnameyî do bêrê nuştene. Dima zî çalakîyê karavanî û vatişê sloganî do bêrê kerdene.

Eke teber de keye û hêzê hîsgerî eşkerayîyanê çapemenîye danê verê Mehkemeya Qanûnê Bingeyî de çalakîya roniştişî bikerê û kuçeyan bivurnê qarê xoverdayîşî. Ma pê bawer ê ke şarê ma, hêzê demokrasîyî, dostê ma, wayîrê wijdanî, keyeyê ma tewirê xo yê exlaqî do bimojnê û vera kerdişanê qirkerdişan ê zîndanan bêveng nêminê, bibê vengê xoverdayîşî. Ma keyeyanê embaz Sabrî Kaya û Vefa Kartalî rê serweşîye wazenê û sozê xo dibare kenê ke ma do wayîrê vîrameyîşanê înan bivejîyê.''