Tepişteyo nêweş Abdurrahman Gemicioglu yo ke Zîndanê Tîpê Fyî yê Wanî de yeno tepiştene 25ê teşrîna verêne ra nata Nêweşxaneyê Cigêrayîş û Perwerdeyî yê Unîversîteya Wanî de servîsê ciewnîyayîşê giranî de tedawî vîneno. Gemiciogluyo ke nêweşê kanserê rektum û kolonî yo nêweşxane de sey entube tedawî vîneno. Servîsê ciewnîyayîşê giranî de û verê ci de leşkerî nobete tepişenê.

Kênaya Gemiciogluyî Elife Gemicioglu vat leşkerî nêverdenê a babîye xo bivîno û wina dewam kerd. ''Çend şino rewşa babîya mi xirabe bena. Rixmo ke rewşa babîyê mi wina xirab a, bi kelemçeyan yeno tedawîkerdene. Rewşa babîyê mi zaf giran a, heqê ci yê cuye destê ci ra ameyo girewtene. Dezgehê Tibê Edlî (ATK) zî raporî nêdano. Bi zanayîşî babîyê mi mirnenê. Ganî ATK cade raporê xo hazir bikero. Babîyê mi mergî rê ameyo caverdayene û pêro rayapêroyîye seyr keno. Sere de Wezîrîya Edalet ganî pêro dezgehê eleqedarî çîyêk bikerî. Wa çew vera na rewşe bêveng memano.

Babîyê mi 2012 de bi operasyonê KCKyî ame tepiştene û dima ra bi kontrolî serbest veradîya. Dosyaya ci hetê Mehkemeya Berze ra ameye tesdîqkerdene û qerarê tepiştişî vejîya. Nêweşê prostat û dima ra pê nêweşîya kanserê rektumî kewt. Xeylêk reyî amelîyat bi. Xeylêk nêweşîye bînî vejîyayî. Sey entube nêweşxane mend û nika nêeşkeno nefes bigîro. Nêweşîyê ci yê sey qelb û velgan zî est ê. Çimê ci nêvînenî. 23 rojan de 26 reyî wedarîya nêweşxane û nika nêweşxane de servîsê ciewnîyayîşê giranî de yo. Hinî zanîyê ci nêtepişenê, nêeşkeno şiro rayîr ra. Ganî selahîyetdarî û rayapêroyîye na babete de hîsgêr bê. Nêverdenê ma bêrê yewna nêweşxane ke dahîna hole bêro tedawîkerdene. Babîyê mi serbest veranêdanê mergî rê caverdenê.''