Gerîlaya YJA Starî Hamîyet Yalçinkaya operasyonê dewleta tirke yê vera Besta de şehîde bibî û cenazaya ci goristanê bêkesan ê bajarî de amebî definkerdene. Badê safîbîyayîşê testê DNA merdimanê aye cenazaya ci 23ê gulane de taxa Tepecîkî ya Bismîlê Amedî de binê ablûqaya polîsan de defin kerde.

Taxe de tezîye ameye ronayene. Ewro îdarekaranê MEBYA-DER, Partîya Çep a Keske, HDP, DBP, MED-DER, TUAY-DER, TJA û Komeleya 78an keyeyê Yalçinkaya zîyaret kerd. Tezîye de semedê şehîdanê demokrasî û azadîye rêz ame girewtene.

Endama MEBYA-DERî Meryeme Soylu vat, "Lelya Amed semedê nê şarî têkoşîn kerd. Gerek ma wayîrê têkoşînê înan bivejîyê. Semedê nê yewîya mabênê kurdan şert a.  Eke ma bibê yew, qet yew hêz nêeşkeno verê têkoşînê kurdan de vindero."