Semedê gerîlayê HPGyî Pasûr Rohatî (Cihat Ay) yo ke 18ê êlule de Licê de şehîd bi, dewa Cihekanî ya Pasûrê Amedî de tezîye ameye ronayene. Tezîye bi girseyî ameye zîyaretkerdene.

Komeleya Paştdayîşî ya Kesanê ke Merdimê xo Vînî Kerdî  (MEBYA-DER), Komeleya Paştdayîşî yê Keyeyanê Tepişteyan (TUAYDER), Komeleya Alîmanê Dînî ya Amedî, Meclîsê Dayîkanê Haştîye, Komeleya Cigêrayîşê Kultur û Ziwanî ya Mezopotamya  (MED DER),  Têgêrayîşê Cinîyan ê Azadan (TJA), Îdarekarê  HDP, DBPyî yê bajar û qezayan û wekîla Partîya Çep a Keske Adalete Kaya tewrê zîyaretî bîyî.

Tezîye de badê rêzgirwetişê semedê Şehîdanê Azadîye yê Kurdîstanî duayî ameyî wendene.

Hemsereka MEBYA-DERî Yuksele Almasa ke tîya qisey kerd nê vatî: ''Dewleta tirke bi heme wehşetê xo vera şarê kurdî polîtîkayanê xo domnena. Bi şehîdanê ma ganê ma dejnenê. Cenazayanê domanan dayîke û babîyan rê pê kargoyan şawenê. Heqê her kesî est o ke cenazaya ci bi merasîmê dînî bêro definkerdene. Ma do rixmê nê îşkenceyanê dewlete, wayîrê şehîdanê xo bivejîyê.  Sey şehîdan, sereyê ma zî do tim berz bo. Şexsê keyeyê ma de wa sereyê pêro keyeyanê ma weş bo, şehîdê ma bêmerg ê.''