2 fotografî; înan ra yew Qesra Erdoganî ya Beştepe de oyo bîn zî Sersefîrîya Berze ya Tirkîya ya Parisî de amebi girewtene. 2 fotografan de 2 kiştoxî, sersefîrîye û qesre estê. Êyê ke ferman danê, êyê ke serûber kenê û êyê ke kişenê heman fotografan de yê.

Hezîrana 2017î de Bruksel de dormeya bînaya KNKyî de wesayîtêkê bi markaya Mercedes gêrayêne û agahîyê îstîxbaratî arê dayene. 14ê hezîrane de tewr tay 3 reyî wesayît dormeyê KNKyî de gêra. Polîsan zî wesayît teqîb kerdêne. Rixmo ke kurdan hende gerreyê ci kerd polîsî zaf goş pê nêkuwabî.Wexto ke wesayît kewt tunelêk polîsan bi bahaneya 'lezîye' o vindarna. Wesayît de 3 kesî estbî. Polîsan ê peya kerdî. Kontrol de nasnameyê gumanbaran ameyî tesbîtkerdene, fotografê înan ameyî girewtene. 

Dadgerî û polîsanê Belçîka xîretê sûîqastî ser o mîyanî ra cigêrayîş kerd û qasê hezaran rîpelî amade kerdî.

Zereyê wesayîtî de tîma kiştişî

Zereyê wesayît de 3 kesî estbî. Nînan ra yew Zekerîya Çelîkbîlek bi ke leşker bi. Rojnameyê Journal de Dimanche yê Fansa 14ê Adare de nameyê nê 3 kesan eşkera kerdbi. Çelîkbîleko ke hemwelatîyê Fransa bi o çax 6-7 mengan ra nata banlîyoyê Argenteulî yê Parisî de mendêne. Keso diyîn Yakup Koç bi û o zî polîsêko tirk bi. Nameyo qod ê Yakup Koçî Albay o. Operasyonê Brukselî ey serûber kerdêne. Keso hîrêyîn Haci Akkulak bi ke eslê xo de kurd bi û Belçîka de mendêne.

16ê hezîrane de gef zêdêr eşkera bi. Nê çar kesî ameybî Belçîka û daîreyêk kîra kerdbi. Înan ra yew sekban o. Hedefê înan de zî Hemserekê KONGRA-GELî Remzî Kartal û Endamê Konseya Rayberdişî ya KCKyî Zubeyîr Aydar bîyî.

Goreyê zanayîşanê ke ma çimeyanê dosya ra girewtê, nê serebûtê wesayîtî ra çend mengî dima operasyonêk ame kerdene. Çelîkbîlek û Yakup Koç şîbî. Polîsanê Belçîka herinda ke înan ser o tehqîqar bikerê giranîye daye lingê Belçîka yê karê ajanîye ser. Polîsan şaristanê Gentî de eşt keyeyê tirkê bi nameyê Necatî Demîrogullariyî ser û xeylêk materyalî vistî destî.

Akkulak dima ke ajanîye qebul kerde fam kerd ke serebût pê sûîqastî do binetîce bibo û hem dezgehê kurdan hem zî polîsê Belçîka agahdar kerdî. Ame zanayene ke oyo ke Akkulak vist mîyanê tîma kiştişî ya tirkan Necatî Demîrogullari bi. Demîrogullari wexto ke polîsan eşt keyeyê ci serno îtîraf kerd. Goreyê zanayîşan Demîrogullari zamayê Yakup Koçî yo û materyal dayêne ci.

Îtîrafê wird kesan nojna ke tîma kiştişî Sersefîrîya Berze ya Tirkîya ya Parisî reyde wayîra têkilîyêka xurt a. Çelîkbîlekî pêvînayîşêkê taybetî de Haci Akkulakî rê vat ke Paris de qetilkerdişê 3 cinîyan ê kurdan ê şorişgêran de rolê ci estbi.Nê tehqîqat kerd ke derheqê Qirkerdişê Parisî de tehqîqatêko newe bêro kerdene. Gulana 2019î de tehqîqat newe ra dîy destpêkerdene. Avûkatê keyeyanê 3 cinîyan ê kurdan vanê ke Ewropa de hînî derheqê qirkerdişî de  torrêka xurte ya esta.

Fotografî

Fotografanê ke ANFyî vistî detî tîma kiştişî ya Belçîka kifş kerde û têkilîya înan zî eşkera kerde. Nê fotografan ra yew de dîyeno ke Çelîkbîlek Sefîrê Berzî yê Tirkîya Îsmaîl Hakki Musayî reyde wayîrê têkilîyêka xurte yo. Ê kesê bînê ke fotograf de yê nêşinasîyenê. Fotograf zereyê Sersefîrîye de ameyo girewtene. Fotografê bînî de zî Çelîkbîlek salona Qesra Erdoganî ya Beştepe de dîyeno. Serê ci de qatlixêko kesk esto. 

Fotografê Koçî mabênê  2008-2011î de ameyî girewtene. Nînan ra yew rayîrê Bratislava de, oyo bîn zî girawa namdare ya Fransa Mont-Saint-Michel de ameyo girewtene. Nînan xeylêk cayan de sey 'turîst' fotografî antî.

Koordînator Îsmaîl Hakki Musa

Dosyaya tehqîqatî ya Belçîka de vajîyeno ke ''çalakîyê Ewropa yê torra ajanîye û kiştişî yê Ewropa hetê ÎsmaÎl Hakki Musayî ra ameyî koordînekerdene.' Wexto ke serê ci şikî zêdîyayî Musayî wezîfeyê xo war verda.

Dima ke Sakîne Cansiz, Fîdane Dogan û Leyla Şayleme Paris de ameybî qetilkerdene verî her kesî Anqara ra şik kerd. Netîceya cigêrayîşan de tesbît bi ke no qirkerdiş hetê MÎTî ra amebi organîzekerdene. Îsmaîl Hakki Musa mîyanê gumanbaran de bi. Musayo ke wextêk wekîlê Musteşarê MÎTî bi, mîyanê MÎTî de payeberzo diyîn o tewr pîl bi. O wexto ke torra ajanîye û xîretê sûîqastan zêdîyaybî Parisî rê ame tayînkerdene.

Musa 1980 de seba zanîngehî ame Fransa. 1ê teşrîna peyêne ya 2011î de Bruksel de bi Sersefîr, teşrîna verêne ya 2012î de sey Hetkarê Musteşarîya MÎTî ame tayînkerdene. Musayî serrêke Bruksel de camî, komele, selefî û nîjadperestanê tirkan reyde têkilîyêka xurte naye ro û coka bala îstîxbaratê Belçîka ante.

Dima ke Musteşarê MÎTî Hakan Fîdanî seba namzetîya wekîlîye îstîfa kerd Musa 10ê sibata 2015î de bi Wekîlê musteşarê MÎTî û heta 10ê sibata 2015î nê wezîfeyî rê dewam kerd. Wexto ke Musa mîyanê MÎTî de wezîfe kerdêne û Bruksel û Paris de bi sefîr, hînî bi destê MÎTî  xeylêk sûcê giranî kerdî.

Musa temmuza 2016î de Sersefîrîya Parisî rê ame tayînkerdene. Heman wextî de dewleta tirke mabênê camî û waranê rêxistinîya îstîxbaratî  kerd xurt. Nê tayînî ra mengêke dima tetîkkêşê Qirkerdişê Parisî Omer Guney 17ê kanûna 2016î de zîndan de bi hawayêkê şikdarî merd.