Wekîlê HDPyî Erol Katiciogluyî xoverdayîşê karkereran û rewşa ekonomîya Tirkîya erncnayî.

Katirciogluyî bale ante rewşa xirabe ya ekonomî ser û vat: ''Seba ke ercê TLyî kêmîya, enflasyon şi dîyar û her roje zemî benê netîceya naye de xoverdayîşê karkeran dest pêkerd. Riha de se rojan ra zafêr o ke têkoşînê karkeran esto. Reyna Şîşlî de 786 karkerî semedê heqanê xo têkoşîn kenê. Hetê bînî ra  sektoranê cîya cîyayan de karkerî têkoşîn kenê. têkoşînê ke Tirkîya de semedê problemanê ekonomî û demokrasî yenê kerdene zaf muhîm ê.

Katirciogluyî vat muhalefet hêzê xo di hetan ra geno û wina dewam kerd: ''Nînan ra yew têgêrayîşê sîyasîyî yê kurdan o. O bîn zî têkoşînê sendîkayan o.  Ê diyînî zaf amebi zehîfkerdene la badê rewşa xirabe ya ekonomî xo ano pêser. Kurdî waştişanê xo tim bi vengê berzî anê ziwan û rixmê zextanê giranan waştişanê xo canêverdenê. Têkoşînê karkeran verî dahîna hol bi.  Badê 80yan bi qanûnanê neweyan verê sendîkayan ame girewtene.  Coka têkoşînê karkeran hend veng nêvejeno. Wina yeno mojnayene ke HDP zafêr sîyasetê nasnameyî reyde eleqedar o û goş nêdano têkoşînê karkeran la ma nê wird têkoşînan sey yewbînan vînenê.''

Katirciogluyî vat: ''Muhalefetê Tirkîya vano eke îqtîdar bêro bedilnayene ekonomî beno hol la no raşt nîyo. AKP dewlete serûbin kerde. Dezgehê dewlete ameyî bedilnayene, xizmetê şarî nêkenê. AKP û dewlete bîyî yew. Xesar zaf pîl o.  Ganî Tirkîya newe ra bêro ronayene. Agêrayîşê sîstemê palamenterî qîm nêkeno. Tirkîya butçeya xo semedê şerî xerc kena.Eke Tirkîya de herinda poltîkayanê şerî de polîtîkayê haştîye biamêyene rayraberdene krîzê ekonomî wina xorî nêbîyêne.'''