Wezîrê Pawitişî yê DYA Mark Esperî derheqê gefê Tirkîya de qisey kerd ke Tirkîya ardbi ziwan ke eke hewce bibo ê do qerargehê Încîrlîkî û Kurecîkî bigêrê.

Qerargehê Încîrlîkî bi desan serrî yo ke ser qerargehê hewayî yê DYA yeno xebitnayene. Goreyê pisporan Încîrlîk de qasê 50 serekê nukleerî estê. Kurecîk de zî îstasyonanê girîngan ê radarî yê NATOyî ra yew esto.

Esperî Pentagon de qisey kerd û vat: "Seba ke ma baş fam bikê ke wazenê se bikê û cidî yê yan ney ganî hemkarê xo yê tirkî (Hulusî Akar) reyde qisey bika."

Esperî vat: "Eke Tirkîya na babete ser o cidî biba, neteweyêka xoser a û heqê ci esto ke qerargehanê NATOyî yan zî hêzêkê xerîbî qebul bika yan nêka. Labelê eke bi hawayêkê cidî qisey kena hînî na mesele bena meselêka cidîye ke Îtîfaqê Atlantîkî û terefgîranê peyama Îtîfaqê Atlantîkî zî eleqadar kena."

Wezîrê Pawitişî yê DYA reyna ard ziwan ke ê xemgîn ê ke Tirkîya NATO ra kewte dûrî û bîye nêzdîyê Rûsya.

Têkilîyê mabênê Tirkîya û DYA hewteyanê peyênan de zî xirab bîyî. Dima ke dewleta tirke sîstemê pawitişê hewayî yê S-400î Rûsya ra girewt û dest bi îşxalê vera Rojawanî kerd Kongreya DYA bire girewte ke seba Tirkîya ambargoyê ekonomîkî bîyara ca.