HDP çarçewa Konferansê Îdareyanê Herêmîyan ê Demokratîkan ê HDPyî de qezaya Peyasî ya Amedî de Konferansê Amedî yê Herêmîyî keno. 

Temsîlkarê partîyanê sîyasîyan, wekîlê Partîya Têdûştîye û Demokrasîyî ya Şaran (HEDEP), Têgêrayîşê Cinîyan ê Azadan (TJA), Meclîsê Mayanê Haştîye, Komeleya Huqûqnasanê Seba Azadîye (OHD) û xeylêk kesî tewrê konferansî bîyî.

Hemvervatoxê Heyetê Îdareyanê Herêmîyan ê Demokratîkan ê HDPyî û Wekîlê HEDEPî yê Êlihî Mehmet Ruştu Tîryakîyî konferans de qisey kerd. 

Tîryakîyî qiseykerdişê xo de şerê Îsraîl-Hamasî vist vîrî û vat: ''Aseno ke no şer do giranêr bibo. Ma hertim hetê şarê Filîstînî de yê. Her roje Filîstîn de sivîlî dîyenê bombayan ver. AKP-MHPyo ke qaşo paştî dano şarê Filîstînî Îsraîl Filîstîn de se keno, Rojawan de heman çî keno. Ma nê zulmê Îsraîlî ne zî zulmê AKP-MHPyî qebul nêkenê.''

Tîryakîyî dîyar kerd ke înan heta nika tewr tay 600 kombîyayîşî kerdê û vat: ''15ê teşrîna verêne de kongreya xo de ma xeylêk çîyan ser o nîqaşî kerdî û proseso newe da destpêkerdene. Ma do menganê verê ma de, derheqê weçînayîşanê herêmîyan de kombîyayîşanê şarî bikerê. Ma seba dîyarkerdişê namzetanê xo keye bi keye do bigêrê, goreyê pêşnîyazanê şarê ma namzetanê xo eşkera bikerê. Ma do bi nê fikran weçînayîşan rê xo amade kenê. Ma eşeknê cewabê weçînayîşanê gulane weçînayîşanê herêmîyan de bidê. Ma do pîya ser bikewê.''