24ê nîsane de polîsan eştbi bînaya DEM Partî ya Êlihî ser û bi setan bîna de cigêrayîşî kerdbî. Sereştiş de posterê şehîdan, rojname û alê partîye dîyayî war. Vizêr zî Hemserekê DEM Partî yê şaristanî Mustafa Mesut Tekîk ame destbendkerdene û dima vera dîya.

Wekîlê DEM Partî yê Êlihî Mehmet Ruştu Tîryakîyî derheqê sereştişê vera bînaya DEM Partî de ANFyî rê qisey kerd.

Tîryakîyî ard ziwan ke sereştiş û operasyonê vera DEM Partî bêhuqûqî yê û vat: ''Polîsî binê nameyê gerreyî de ke biwazê nêeşkenê bierzê bînayanê ma ser. Reya verêne Êlih sereştiş û operasyonêkê winayênî de têrî nêmaneno. Çend reyî wina polîsan eştbi bînaya ma ser. Îqtîdar nêeşkeno bi operasyonanê winayênan netîce bigêro. Êlih warê sîyasetî de wayîrê cayêkê girîngî yo. Şaristanê ma serranê 90an de barbarîya Hîzbulkontrayan dîbî. Weçînayîşanê 31ê adare ra verî xîret ame kerdene ke partîya ma û namzeda ma bêrê reşkerdene la ma bi xurtî ser kewtî. Embaza ma Gulîstane Sonuk mîyanê pêro namzedanê 81 şaristanan de raya tewr zafe girewte. Êyê ke sindoqan de ser nêkewtî nika kenê ke bi operasyonan partîya ma bin bikerê. ê vanê qey do partîya ma, hemserekanê ma û şarê ma bitersnê xo xapînenê. Rêxistina ma ya Êlihî û şarê ma bi xurtî payan ser de yê.''

Tîryakîyî eşkerayîya Wezîrîya Edaletî ya ''DEM Partî eşkena bêra qefilnayene'' ser o vat: ''Ê vanê qey DEM Partî qels a. Îqtîdar bi hawayêkê zelalî partîya ma rê gefan wanena. Ma hêvîdar ê ke îqtîdar do şaşîyêka winayêne nêkero. AKP bi xo hol zaneno ke nê welatî de qet yew mesele bi qefilnayîşê DEM Partî çareser nêba. Şarê ma tim do cewabê hewceyî bido. Ganî AKP nê cewabî hol biercno.''