Rayberê Şarê Kurdî Abdullah Ocalan 15ê sibate ya 1999î ra nata Îmrali de binê tecrîd de yo. Tewr peynî de 25ê adar de Abdullah Ocalanî dir 4 deqeyî pêvînayîşê telefonî ame kerdene. Tepişteyê PAJK û PKKyî vera tecrîdî 147 rojî yo grevê vêşanîye de yê. Muracatê pêvînayîşê yê Avûkatanê Ocalanî timûtim yeno redkerdene. Wekîla HDPyî ya Amedî Remzîye Tosun derheqê babete de ANFyî rê qisey kerd.

Remzîye Tosun vist vîrî ke Rayberê Şarê Kurdî Abdullah Ocalan 22 serrî yo binê tecrîdî de yo û vat: ''Abdullah Ocalan semedê demokrasî û meseleya kurdî kesêko muhîm o. Şexsê Abdullah Ocalanî de şarê Rojhelatê Mîyanênî yeno tecrîdkerdene. Komelê tirk û kurdî bi tecrîdî gerîyayo binê ablûqa. Abdullah Ocalan heme dinya de yeno naskerdene û Rojhelatê Mîyanênî de fikrê ci yenê caardene. Bi mîlyonan kurdî ey sey rayberê xo vînenê. Nê semedî ra dewlete tecrîdî xorîyêr kena. No tewirê dewleta tirke semedê şaranê Tirkîya tesîro xirab keno. Ma yew proses de yê ke fikro azad sey sûcî yeno vînayene. No proses pabesteyê Îmraliyî yo.''

Tosune bale ante serê ke bi mîlyonan kurdî Îmraliyî ra xebêreke pawenê û wina dewam kerd: ''Dewlete bi tecrîdî wazena ke Abdullah Ocalanî şarî ra raqilno.  Tecrîd têna tesîrê kurdan nêkeno, heme komelê Tirkîya binê tecrîd de yo. Tewr zaf zî cinîyan ser o tesîr keno. Badê tecrîdê Îmraliyî qetilkerdişê cinîyan vejîyayî merheleya tewr berze. Reyna Kurdîstan de sey girêdeyeyê tecrîdî vera komelê kurdî şero taybet yeno rayraberdene. Tecrîdê 22 serran 2015î de kewt merheleyêka cîyaye û caardişê taybetî kewtî dewre. Wextê îradeyê xoserî de dewlete her ca de waşt ke îradeyê kurdan bişikno û mabênê Abdullah Ocalanî û kurdan dês rono. La Abdullah Ocalan û komelî cêserfînayîş mukun nîyo.''

Remzîye Tosun azadîya Abdullah Ocalanî sey azadîya şarî hesibna û vat: ''Ganî Abdullah Ocalan hînî azad bo. Ganî têna semedê wedaritişê tecrîdî nê semedê azadîya fîzîkîye ya Abdullah Ocalanî têkoşîn bêro pîlkerdene. Abdullah Ocalan vano 'heta cinî azad nêbo komel nêeşkeno azad bo'.  Bi tecrîdî yeno waştene ke têkoşînê cinîyan bêro dosnayene. Ganî tewr zaf cinîyî vera tecrîdî têkoşîn bikerê û xo ver bidê. Azadîya cinîyan pabesteya azadîya Abdullah Ocalanî ya. Azadîya Ocalanî do meseleyanê Rojhelatê Mîyanênî çareser bikero û huzur bîyaro herême.''

Remzîye Tosune  vat:  ''Dewlete bi destûrnêdayîşê telefonî fîna çiman ver ke senî rewşa zore de ya. Dewlete hem seba ke xo rewşa zore ra bixelisno û hem zî raştîyan komelî ra binimno destûrê telefonî da. Rexneyê Abdullah Ocalanî ke telefonî de kerdî biheq ê. Abdullah Ocalanî waşt  dewlete wa caardişanê bêhuqûqan caverd û goreyê qanûnanê mîyanneteweyî têbigêro. Nê waştişê heqdarî ganî cade bêrê caardene. Eke meseleya kurdî bi rayîranê demokratîkan nêro çareserkerdene no Tirkîya rê zaf çî dano vînkerdene. Muxatabê meseleya kurda Abdullah Ocalan o. Semedê înşakerdişê îtîfaqê faşîstî tecrîdî giranêr kenê. Qala refmormî kenê. Eke  raşta samîmîyê wa verî tecrîdî wedarê.''

Tosunê qiseykerdişê xo wina qedîna: ''Grevê vêşanîye semedê verê prosesî akerdişî metodêk o. Ganî helêke cuwa ver waştişê tepişteyan bêrê caardene. Na rewşe serê cuya merdiman de tesîro xirab verdena. La heta nika dewlete û selahîyetdaran gamêke nêeşta.Dewlete ganî berpirsîyarîya xo bîyaro ca.  Ma yew proses de yê ke hema hema kurd û muxalîfê ke nêtepişîyayî çîn ê. Coka tepişteyî mecbur mendî ke kewtî grevê vêşanîye. Her çî ra ver ganî waştişê tepişteyan bêrê ca. Tecrîd bêro wedaritene. Tecrîd sûcê merdimîye yo.''