Komeleya Hetkarîya Bi Keyeyanê Tepişteyan (TUAY-DER) Sûrê Amedî de Kongreya Asayî ya Çarine kerde. 

Hemserekê MED TUHAD-FEDî, Eyleme Bîrtane û Kerem Canpolat, Hemserekê MEBYA-DERî Semîre Akkoç û Mehmet Emîn Kiliç, Wekîla DEM Partî Ceylane Akça, rêxistinê DEM Partî û DBPyî yê Amedî, dadîyê Nobeta Edaletî, Mayê Haştîye û xeylêk kesî tewrê kongre bîyî.

Kerem Canpolatî kongre de pare kerd ke zîndanan de tepişteyê sîyasîyî xoverdayîş de yê. Canpolatî da zanayene ke Rayberê Şarê Kurdî Abdullah Ocalanî ra xeberêke nêna girewtene û venga pêro kesan da ke vera tecrîdî têkoşînî pîlêr bikerê.

Çalakîkeranê Nobeta Edaletî ra Afîfe Kartal îfade kerd ke ganî bi têkoşînî tecrîd bêro şiknayene û vat: ''Ganî her kes vera tecrîdî vengê xo berz bikero. Heta peynî ma hetê domananê xo de yê.''

Mehmet Emîn Kiliçî ard ziwan ke 9ê hezîrane de Salona Dawetî ya Kaplan Cityî de ê do keyeyanê tepişteyan de bêrê têhet û venga her kesî da ke tewrê kombîyayîşî bibo.

Hemserekê OHDyî yê Amedî Riza Polatî vat ke heta ke tecrîd biqedo xoverdayîşê zîndanan do dewam bikero.

Hemsereka DBPyî ya Amedî Sultane Yaray qiseykerdişê xo de qetilkerdişê Yildirimî şermezar kerd û vat ke ganî her kes wayîrê xoverdayîşê zîndanan vejîyo.

Hemserekê DEM Partî yê Amedî Abbas Şahînî vat ke tecrîdê Îmraliyî vilayê pêro komelî bîyo.

Qiseykerdişan ra dima raporê xebatan ameyî wendene û îdareyo newe ame weçînayene.

Yeter Eren Tuna, Cîhan çîçeklî, Azad kaya, Încî Guler Altindal, Nerîman Aydin, Eşref Yaşa, Mizbah Mûnar, Nûriye Kaya, Şaban Yegîn, Mehmet Ayder, Ferhat Koçeroglû, Huseyîn Okkan, Remziye Odungît, Alî Riza Kiyar, Osman Bulent Guler û Bekir Aydin bîyî îdarekarê neweyî.

Hemserekê neweyî zî do rojanê verê ma de bêrê eşkerakerdene.

Kongre bi selamkerdişê îdareyê newîye qedîyaye.