Qurbanê Qirkerdişê Garî yê Anqara yê 10ê Teşrîna Verêne ya 2015î cayê qetilkerdişî de ameyî yadkerdene. Hemsereka DEM Partî Tulaye Hatîmogullari zî tede temsîlkarê xeylê partî û dezgehan û xeylê kesî tewrê yadkerdişî bîyî.

Girseyî hêverî ver bi Meydanê Garî rayraşîyayîş kerd. Tîya de seba qurbanan deqayêk rêz ame girewtene û nameyê 103 kesan ameyî wendene.

Sereka Komeleya 10 Ekimî Mehtape Sakîncî tîya de metno hempar wend û vat ke Qirkerdişê 10ê Teşrîna Verêne cînayetêko sîyasî bibi.

Hemsereka DEM Partî Tulaye Hatîmogullari zî yadkerdiş de qisey kerd û îfade kerd ke a roje merdimî seba haştîye ameybî pêser la hetê DAÎŞî ra bi ardimê dewlete ameybî qetilkerdene. Hemsereke pare kerd ke rixmo ke hayîya dewlete bi hêrişî est bîya hêriş asteng nêkerdo. 

Hemsereka DEM Partî Tulaye Hatîmogullari dîyar kerd ke têkoşînê înan ê seba haştîye do tim dewam bikero û ê do seba caardişê edaletî tim têbigêrê. Tulaye Hatîmogullari vat: ''Ma soz danê ke şima xo vîr a nêkerê, mîyanê têkoşînê xo de her warî de şima bidê ciwîyayene.''

Qiseykerdişan ra dima cayê qetilkerdişî de qeranfîlî ronîyayî.