Nobeta Edaletî ya Şenyaşaran verê Wezîrîya Edaletî de dewam kena. Hemsereka Pêroyî ya DEM Partî Tulaye Hatimogullari bi heyetêkî roja 58. ya Nobeta Edaletî de Emîne Şenyaşar  zîyaret kerd û înan verê Wezîrîya Edaletî de pîya fitar kerd a.

Zîyaret de verî lajê Emînê Şenyaşar û wekîlê DEM Partî Ferît Şenyaşarî qisey kerd. Şenyaşarî ard ziwan ke şeş aşmî verî Wezîrîya Edaletî soz da ke kiştoxî do bêrê cezakerdene la sozê nêtepiş û vat: ''Coka ma verê Wezîrîya Edaletî de nobeta xo domnene. Nêweşxane de babî û di birayê mi ameyî qetilkerdene la kamerayê nêweşxaneyî ameyî diznayene.  Heta serbestverdayîşê birayê mi çalakîya ma do dewam bikero.''

Emîne Şenyaşar zî vat heta ke lajê ci bêro veradayene a do verê Wezîrîya Edaletî cameverdo.

Tulaye Hatimogullari verê fitarî eşkerayîye daye û nê vatî: ''Nobeta Edaletî ya Emîne Şenyaşarî verê Wezîrîya Edaletî de dewam kena. Dayîka ma roje tepişena û tim tîya fitarê xo kena a. Waştişê Şenyaşaran waştişê ma yo. Keyeyê Şenyaşarî ameyo mexdûrkerdene. Îqtîdarê AKPyî nê cînayetî rê çimê xo girewtî. Mehkeme de herinda qetilkeran de êyê ke ameyî qetilkerdene, ceza dîyaye înan. Coka çalakîya dayîke zaf bimana ya. Fadil Şenyaşaro ke birîndar ame tepiştene, bîlasebeb yeno hepskerdene û kiştoxî serbest gêrenî. Heta caardişê heq û huqûqî ma do paştî bidê nê têkoşînî.''