Hemsereka Pêroyî ya DEM Partî Tulaye Hatimogullari kombîyayîşê koma cinîyan a partîya xo de rojdem erjna. Endamê Înîsîyatîfê Dayîkanê Haştîye, dayîka Denîze Poyraza ke ameye qetilkerdene, Fehîme Poyraz, hemşaredarê Mêrdîn, Êlih û Xelfetî û xeylêk cinîyî tewrê kombîyayîşî bîyî. Cinîyan bi tîlîlîyan sloganê ''Qeyûmî do şirê,ma bimanê'' û ''Jin Jiyan Azadî'' vatî.

Tulaye Hatimogullari bale ante slogana “Jin, jiyan, azadî” ser û nê vatî: ''Na slogane heme dinya ra vila bîye. Ma cinîyî tim yenê qetilkerdene. Têna 2024 de 395 cinîyî hetê camêrdan ra ameyî qetilkerdene. Teşrîna verêne de 48 cinîyî ameyî qetilkerdene. Mergê 23 cinîyan zî şikdar o. Eşkera kiştoxî camêrdê sîstemê sertestî yê. Ma nêwazenê wa yewna cinîyê bêro kiştene. Coka ganî ma têkoşînê xo bi xurtkerdişî bidomnê.

Îqtîdar bi qeyûman keno ke heqê ma yo bingeyî yê vîjnayayîşî destê ma ra bigîro. Ma tîya ra reyna vanê qeyûm goreyê qanûnan nîyo û qeraranê Komîsyonê Venedîkî binpay keno. Qeyûm derbeya sîyasî ya ke bi destê hukmî û polîsan yena kerdene. Qeyûm dişmenê kurdan o, dişmenê cinîyan û muxalîfan o.Qeyûm vera sîstemê ma yê hemserekîye hêrişêk o. Qeyûman verî hêrişê dezgehanê ziwanê dayîke, merkezanê cinîyan kerd. Sîstemê hemserekîye xeta ma ya sûr a. Ma do semedê pawitişê destkewteyanê xo têkoşînê xo xurtêr bikerê.

Ê ke vanê meseleya kurdan çîn a, ma tîya ra reyna venga înan danê. Nê welatî de, na herême de meseleya kurdan est a. Ma her firset de derheqê munaqeşeyanê peyênan de fîkrê xo vanê. Ma tîya reyna vajê. Ma sey DEM Partî wazenê zemînê demokratîkî de haştîyêka bianore biba. Semedê nê ganî cade tecrîdê Îmraliyî bêro wedaritene, Birêz Ocalan bibo azad. Eke Birêz Ocalan bibo azad eşkeno semedê haştîya  welatê ma û herême zaf çî bikero. Hemserekê Pêroyî yê MHPyî ewro reyna derheqê babete qisey kerd. Ma çareserîye Anqara de, Amed de wazenê. Wa çew çamûr meerzo têkoşînê ma yê haştîye yê bianorî. O çamûr agêren beno şima ro.''