Qezaya Samandagî ya Hatayî de Yeni Parke de bi şîarê ''Vera rezervî Samandagî bipawê'' mîtîngêk ame kerdene.  Hemsereka Pêroyî ya DEM Partî Tulaye Hatîmogullari zî beşdara mîtîngî bîye.

Mîtîng de nameyê Platformê 'Rezervî Rê Ney' ser o Îbrahîm Aydoganî qisey kerd û da zanayene ke erdê Samandagî yeno herimnayene. Aydoganî vat: ''Hukmat bi qanûnê omnibusî xîret keno ke heqê mulkîyetî bikero rayîrê qezençî. Ma do destûr nêdê ney.''

Serekê Baroyê Hatayî Cîhat Açikalinî ard ziwan ke 16 mengî yo têkoşînê înan ê vera rezervan dewam keno û hukmat keno ke erdê şarî xesp bikero.

Tulaye Hatîmogullari zî mîtîng de qisey kerd. Tulaye bale ante girîngîya paştdayîşê komelkîyî ser. Tulaye pare kerd ke îqtîdar bi bahaneya nê rezervan gêreno ke demografîya herême bivurno. Tulaye vat: ''Wexto ke tîya sey herêma rezerve bêra îlankerdene hinî îqtîdar do bieşko her kesî goreyê xo taxanê ma de cabikero. Vera ziwan, kultur, bawerî û erjanê Samandagî hêrişî yenê kerdene. La ma do qetî parçeyêkê erdê xo ra zî fek vera nêdê. Bi xoverdayîşî ma do ser bikewê.''