Hemsereka Pêroyî ya Partîya Demokrasîyî û Têdûştîye ya Şaran (DEM Partî) Tulaye Hatimogullari badê weçînayîşî kombîyayîşê verênî yê heftaneyî yê partîya xo de rojdem erjna.

Tulaye Hatimogullari ard ziwan ke ê weçînayîşê 31ê adare de ser kewtî, şarî ser kewtî  û vat weçînayîş de semedê bindestan Tirkîya de berêkê hêvî bi a.

Hatimogullari nê vatî: " Şaranê Tirkîya weçînayîş de cewabê îqtîdarê AKP-MHPyî da. Şaran bi rayanê xo vat ê zulm û zextê îqîtarî nêwazenê. Ganî sîyasetmedarê Tirkîya mesajê şaran hole fam bikerê. Hem îqtîdar hem zî muxalefet ganî nê mesajî fam bikero. Şarê kurdî zî weçînayîş de bitaybetî waşt ke wa meseleya kurdan bi rayîrê haştîyane bêra çareserkerdene. Ganî îqtîdar û muxalefet pîya goş bidî şarî. Ganî waştişê şarê kurdî bêro caardene. Netîceya weçînayîşî mojna ra ke welato demokratîk eşkeno bêro afirnayene. 

DEM Partî têna qeyûmî nêşawitî, têna şaredarîyê neweyî destnêfînayî. DEM Partî eynî wextî de hetê sîyasetê Tirkîya bewlî kerd. No weçînayîş serkewtişê DEM Partî yo. Ma şarê xo yê erjîyayeyî rê zaf spas kenê û soz danê ci ke ma do serkewtişê xo aver berê.Nê weçînayîş de serkewtişo tewr pîl Wan bi. Şarê Wanî îradeyê xo sindoq de mojna ra bado ke ame waştene ke şaredarîya ci bêro xespkerdene bi têkoşîno xurt mojna ra. Eynî wextî de ma dî ke têna bi têkoşînê hemparî ma eşkenê çareserîya demokratîkî bîyarê. Wan serkewtişo pîl bi, ma pêrunê rê pîroz bo. Ma do nê serkewtişî pîlêr bikerê. 

Xora ma xîle û kayê ke weçînayîşî de ameyî kerdêne xo vîra nêkerdî. Bi weçînayoxanê sexteyan îradeyê şarî ame xespkerdene.Ma do hesabê nê bipersê. Şarê ma 31ê adare de reyna planê çokdayîşî yê îqtîdarî betal kerd. Reyna ame vînayene ke kam ke meseleya kurdan çareser mekero vîn keno. Ma mîyanê nê kaos û têmîyankewtişî de vanê ke çareserî îtîfaqê şaran o. Semedê herême çareserî îtîfaqê tirkan û kurdan, îtîfaqê kurdan û eraban o. Bêrê ma pêro pîya nê îtîfaqan xurtêr bikerê. Ma vera şerî îtîfaqê şaran xurt bikerê, ma vengê haştîye vera  waştişê şerî berz bikerê ke wa haştîye û huzur bêrê  herême. Ma sey DEM Partî semedê haştîye pîya ya Rojhelatê Mîyanênî do xebatanê xo rê dewam bikerê. "