Hemsereka Pêroyî ya DBPyî Çîgdeme Kiliçgun Uçar bi beşdarîya namzedanê qeza yê DEM Partî Îsmaîl Yildiz û Aygul Kapikayali qezaya Hewagî ya Riha de kombîyayîşê şarî kerd. 

Kombîyayîş de mektuba Hemşaredarê Hewagî Zeynel Taşî ameye wendene ke herinda ey de qeyûm amebi tayînkerdene û dima Taş tepişîyabi.

Dima Çîgdeme Kiliçgun Uçar qisey kerd û ard ziwan ke weçînayîşê 31ê adare prosesêko tarîxî yo. Uçare vat: ''Bi rayîrê qeyûman îradeyê şarê ma ame xespkerdene, hemşaredarê ma tepişîyayî û tedayî zêdîyayî. La rixmê pêro hêriş û tedayan zî têkoşînê ma tim dewam kerd û do bikero. Ma HEPî ra heta DEM Partî sîyaseto demokratîk pawit. Ganî ma şaredarîyanê xo apey bigêrê û yewîya kurdan awan bikerê.

Ewro meseleya kurdan tesîrê pêro herême kena û ganî na mesele hinî bêra çareserkerdene. Seba çareserîye zî muxatabo verên Birêz Ocalan o. Seba ney zî ganî o azad bibo. Hînî wextê ma nêmendo ke ma xerc bikerê. Heta ke azadîya Abdullah Ocalanî nêra caardene sozê ke ma seba demokrasîyî danê do bêmana bibê.''

Girseyî bi sloganê ''Bê Serok Jiyan Nabe'' cewab da qiseykerdişê Uçare.