Nobeta cuye ya nêweşxaneyî de mektubê avûkat Aytaç Unsalî yo ke seba Ebru Tîmtîk nuştbi ame wendene.

Avûkat Aytaç Unsalo ke rojeyê mergî de yo, sey Ebru Tîmtîk bi zorî wedarîyabi nêweşxane. Înîsîyatîfê Azadîya Pawitişî verê Nêweşxaneyê Kanunî Sultan Suleymanî yê Halkaliyî de çalakîya nobete keno. Xalê Ebru Tîmtîk Yildirim Denîz û xeylêk avûkatî zî tewrê nobete bîyî. Çalakîya nobete de fotografê Tîmtîke û Unsalî ameyî berzkerdene û sloganê 'Avûkatê şorişgêrî rûmetê ma yê' ame vatene. Çalakîye de mektubê avûkat Aytaç Unsalo ke roja 211. ya rojeyê mergî de yo ame wendene ke seba Ebru Tîmtîk nuşt.

Unsalî mektubê xo de bale ante ser ke Ebru Tîmtîk welat û şarê xo senî heskerdene û vat: ''Embaze, doste, waya mi kişte la ez zana ke a bi zerrîya rehete şîye. Çunku aye semedê edaletî ganê xo eşt werte. Seba ke zanayêne ke a çîyêko raşt kena, bi zerrîya rehete şîye.  Ez zî bi eynî rehetîye rayîrî ra şina. Nika gerek ma semedê waya Ebru û edaletî têkoşînî pîlêr bikerê.''

Nameyê Koordînasyonê Azadîya Pawitişî avûkat Naîm Emînogluyî eşkerayîye wende. Emînogluyî îfade kerd ke dezgehanê dewlete yê ke waştişê Ebru qebul nêkerd, a kişte. Emînogluyî da zanayene Wezîrê Karanê Zereyî wextê nêweşxaneyî de mudaxeleyê her prosesî kerd û seba be Ebru bimira her çi kerd. Emînogluyî ard ziwan ke mehkeme, Wezîrê Edaletî, Mehkemeya Cezaya Girane ya 37. ya Îstanbulî, Nêweşxaneyê Sadî Konukî pêro mesuldarê mergê Ebru Tîmtîk ê û vat: ''Ebru bedenê xo eşt werte. Kes nêeşkeno heqdarîya Ebru çin bikero. Avûkate Ebru Tîmtîk seba hukmkerdişê edîlî bi hawayêkê edîlî şehîd bîye. Ma nêeşkenê na raştîye mîyan bikerê.''