Rêxistinê huqûqî ke verê Baroyê Îstanbulî de ameyî têhet semedê avûkatan Ebru Tîmtîk û Aytaç Unsalî yê ke rojeyê mergî de yê eşkerayîye daye.

Çalakîya ke avûkatî pê cubeyanê xo tewrê ci bîyî, xeylêk parlamenteran zî tede cayê xo girewt. Çalakî de mektubê avûkat Aytaç Unsalî yo ke nêweşxane de bizor yeno tepiştene ame wendene. Aytaçî ard ziwan ke o 30ê temmuze ra  nata bizor nêweşxane de yeno tepiştene û vat: Ez nêweş nîya, tedawî qebul nêkena. Netîceya ci mergî bo zî çew/e nêeşkeno mi tîya bizor tepişo. Qanûn de cayê nê çîn o. Seba ke mi tîya ra nêvejenê sûc kenê. Serhekîm, îdare û doktorê  Nêweşxaneyê Perwerde û Cigêrayîşî yê Kanûnî Sultan Suleymanî naye ra berpirsîyar ê.  Ê rîyê ma rê huyenê la înan rê maxapîyê, ê paştgêrê hukmatê ke bi talîmetê ci têgêrenê.

Cinîya Aytaçî  avûkate Dideme Baydar Unsala ke seba miqatbîyayîşî cayê Unsalî de manena, ard ziwan ke ê yewe nuqta de yê ke sebr û mesafê bîyî teng û vat:  Wezîrîya Edelatî wird avûkatî mergî rê ca verdayî. Ma nê sûcî rê hempar nêbenê vera nê qewimîyayîşan bêveng nêmanenê. Roşnvîr û huqûqnasê welatî do Ebru û Aytaçî bide ciwîyayene.