Mehkemaya Heqanê Merdiman a Ewropa (MHME), qerarê xo yê “şikkerde”yî ra dima , dewaya Cizirî de zî morê xo da binê qerarêde sosretî ro.  Muracatê vera hovîtîya dewleta Tirkî ya qezaya Cizîrî ke  mabênê serranê 2015-2016'î de bi seyan merdimî ameyî kiştene û bajar ame xirabkerdene, ame redkerdene. MHME’yî muracatê bi nameyê Omer Elçî û Orhan Tûnçî red kerd û verê muracatan çarna ra Mehkemaya Qanûnê Bingeyênî ya Tirkîya.

Avûkata dewaya Cizîrî Newroz Uysale derheqê qerarê MHME’yî de ANF’yî reyde qisey kerd û vat ke qerar seba înan suprîzêko gird nêbi û wina dewam kerd:  “Wextê dewamkerdişê qedexeyê tebervejîyayîşî de seba ke verê qetilkerdişî bêro girewtene ma muracat kerdibi. Mehkemaya Qanûnê Bingeyênî o wext qerarê tedbîrî red kerd. Seba qebûlkerdişê tedbîran 5 qerarê MHME’yî estbî. Ma o wext vera qerarî vinetîme û nê qerarê Mehkemeya Qanûnê Bingeyênî MHME’yî rê şawitîbî. Redkerdişê qerarê tedbîrî xeylêk wext girewt. Redkerdişê qeraranê tedbîrî o taw zaf ameybî rexnekerdene. MHME’yî dimayê qerarê tedbîrî ra eşkeyene nê dosyayan padayo la herinda padayîşî de nê sey dosyayê lezabezî girewtî, vat ke ê esas do biercnê û Tirkîya ra persa. Naye ser dosya dewam kerde.

Newroz Uysale ard vîrî ke, 13’ê Teşrîna peyêne roniştiş ame kerdene û ard ziwan ke,  înan 3 serrî yo ke cehd kerdo dewa MHME’yî de dewam bikera. Uysale vat, “Dimayê 13’ê Teşrîna peyêne ma qerar pawitene. Hewteyê naye ra ver vat qerar 7 Sibate de do bêro eşkerakerdene. Seba ke no yeno hewteyê serrgêra qetilkerdişî, ma şîme ser ke no tercîh bizanayîş ameyo dayene. Seba ke MHME’yî dosyaya ra baş zanitêne ke çi kotî, key qewemîyayo. Qeraro ke 45 rîpelî gêno ameyo dayene. Nê qerarî zî îqnakerdişê pêroyî ameyê nuştene. Çîyêko zaf mûhîm esto ke no qerar bi yewvengîye ameyo girewtene. Dosya nika hetê huqûqê zereyî de,  destê Mehkemaya Qanûnê Bingeyênî de ya û MHME’yî zî “Heta ke Mehkemaya Qanûnê Bingeyênî qerar nêdo ez do qerar nêdana;  wa qerar bido,  şima zî bado eşkenê muracat bikero yan nêkerê.”